ജയറാം- പാർവതി ദമ്പതികളുടെ മകൻ എന്നതിലുപരി മലയാളികൾക്ക് ഏറെ പ്രിയപ്പെട്ട യുവനടനാണ് കാളിദാസ് ജയറാം. താരപുത്രന്റെ ബാല്യകാല സിനിമകൾക്ക് ഇന്നും ആരാധകരേറെയാണ്. കൊച്ചുകൊച്ചു സന്തോഷങ്ങൾ, എന്റെ വീട് അപ്പൂന്റേം എന്നീ സിനിമകളിലെ പ്രകടനങ്ങളിലൂടെ മലയാളികളുടെ മനസിൽ ഇടം നേടാൻ കാളിദാസിന് സാധിച്ചു. ഇപ്പേഴിതാ തന്റെ കരിയറിനെ കുറിച്ചും കമൽ ഹാസനോടോപ്പെം അഭിനയിച്ചതിനെ കുറിച്ചും താരം പറയുന്ന വാക്കുകളാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. ബിജോയ് നമ്പ്യാർ സംവിധാനം ചെയ്യുന്ന ‘പോർ’ എന്ന പുതിയ സിനിമയുടെ പ്രമോഷനുമായി ബന്ധപ്പെട്ട് നടന്ന അഭിമുഖത്തിലാണ് കാളിദാസ് ഇക്കാര്യം പങ്കുവക്കുന്നത്.
‘സിനിമയുടെ ഷൂട്ടിംഗ് സമയത്ത് കമൽ സാറിനോട് സംസാരിക്കാൻ പേടിയായിരുന്നു. കുട്ടിക്കാലം മുതൽ കമൽ സാറിനെ കണ്ടിട്ടുണ്ടെങ്കിലും ഷൂട്ടിംഗ് സ്ഥലത്ത് കണ്ടിട്ടില്ല. അതിനാൽ അദ്ദേഹത്തോട് സംസാരിക്കാൻ ധൈര്യമില്ലായിരുന്നു. വിക്രം എന്ന സിനിമയുടെ സെറ്റിൽ വച്ചാണ് കമൽ സാറിനോട് ആദ്യമായി സംസാരിക്കുന്നത്.
സത്യം പറഞ്ഞാൽ അച്ഛന് കിട്ടാത്ത ഭാഗ്യം എനിക്ക് കിട്ടിയിട്ടുണ്ട്. ഈ ചുരുങ്ങിയ സമയം കൊണ്ട് മൂന്ന് തവണ കമൽ സാറിനൊപ്പം അഭിനയിക്കാൻ എനിക്ക് ഭാഗ്യമുണ്ടായി. ഇടയ്ക്കിടക്ക് ഞാൻ അച്ഛനോട് പറയും, ഇത്രയും നാളത്തെ സിനിമാ ജീവിതത്തിൽ മൂന്ന് സിനിമയിൽ മാത്രമേ അപ്പ കമൽ സാറിനൊപ്പം അഭിനയിച്ചിട്ടുള്ളൂ. എന്നാൽ ഇപ്പോൾ തന്നെ മൂന്ന് സിനിമ ഞാൻ ചെയ്തുകഴിഞ്ഞു. അതുപോലെ തന്നെയാണ് ശങ്കർ സാറിന്റെ സിനിമയിൽ അഭിനയിക്കാനും ഈ ചെറിയ കാലം കൊണ്ട് എനിക്ക് ഭാഗ്യമുണ്ടായി’ – കാളിദാസ് പറഞ്ഞു.
