പ്രേക്ഷകർ ഏറെ ആവേശത്തോടെ കാത്തിരിക്കുന്ന ചിത്രമാണ് ‘വർഷങ്ങൾക്ക് ശേഷം’. ഹൃദയം എന്ന ഹിറ്റ് ചിത്രത്തിന് ശേഷം യുവതാരനിരയെ അണിനിരത്തി വിനീത് ശ്രീനിവാസൻ ഒരുങ്ങുന്ന ചിത്രം ഏപ്രിൽ 11 ന് തിയേറ്ററുകളിലെത്തും. സിനിമയുടെ ഓരോ അപ്ഡേഷനും സിനിമാസ്വാദകർക്ക് ആവേശമായിരിക്കുകയാണ്.
കഴിഞ്ഞ ദിവസം പുറത്തുവന്ന മധു പകരൂ നീ താരകേ….എന്ന ഗാനം ഇതിനോടകം ആരാധകർ ഏറ്റെടുത്ത് കഴിഞ്ഞു. യൂട്യൂബിൽ ഗാനം ട്രെൻഡിംഗിൽ ഒന്നാം സ്ഥാനത്താണ്. ഇപ്പോഴിതാ ഈ ഗാനത്തിന്റെ മേക്കിംഗ് വീഡിയോ പുറത്തുവന്നിരിക്കുകാണ്. വളരെ രസകരമായ വീഡിയോയാണ് അണിയറ പ്രവർത്തകർ പങ്കുവച്ചിരിക്കുന്നത്.
ഗാനത്തിന്റെ ചിത്രീകരണം നടക്കുമ്പോൾ ക്യാമറയ്‌ക്ക് പിന്നിൽ നിന്ന് പാടി അഭിനയിക്കുന്ന വിനീതിനെ വീഡിയോയിൽ കാണാം. പ്രണവ് മോഹൻലാലിന് രംഗം അഭിനയിച്ച് കാണിക്കുന്നതും വീഡിയോയിൽ കാണാനാകും ഒപ്പം. അണിയറ പ്രവർത്തകർക്കൊപ്പം പാട്ടുപാടി നൃത്തം ചെയ്യുന്നതും കാണാനാകും. മധു പകരൂ നീ താരകേ…. എന്നു തുടങ്ങുന്ന ഗാനം രചിച്ച് ആലപിച്ചിരിക്കുന്നത് വിനീത് ശ്രീനിവാസനാണ്. സംഗീതം പകർന്നിരിക്കുന്നത് ഗായിക ബോംബെ ജയശ്രീയുടെ മകൻ അമൃത് രാംനാഥാണ്.
View this post on Instagram
പ്രണവ് മോഹൻലാലും ധ്യാൻ ശ്രീനിവാസനും പ്രധാനവേഷത്തിലെത്തുന്ന ചിത്രത്തിൽ യുവതാരനിര തന്നെ അണിനിരക്കുന്നുണ്ട്. കല്യാണി പ്രിയദർശനാണ് ചിത്രത്തിലെ നായിക. നിവിൻ പോളി, അജു വർഗീസ്, നീരജ് മാധവ്, ബേസിൽ ജോസഫ് എന്നീ താരങ്ങളും ചിത്രത്തിൽ പ്രധാന വേഷത്തിൽ എത്തുന്നുണ്ട്.
ഹൃദയത്തിന് ശേഷം പ്രണവ് മോഹൻലാലും കല്യാണി പ്രിയദർശനും വീണ്ടും ഒന്നിച്ച് അഭിനയിക്കുന്ന ചിത്രം കൂടിയാണ് വർഷങ്ങൾക്ക് ശേഷം. വിവിധ കാലഘട്ടങ്ങളിൽ നടക്കുന്ന കഥയാണ് ചിത്രത്തിൽ പറയുന്നത്. നാല് ലുക്കിലാണ് ധ്യാനും പ്രണവും എത്തുന്നത്. മലയാളികൾക്ക് വിഷുക്കൈനീട്ടമായി എത്തുന്ന ചിത്രത്തെ ആരാധകർ വലിയ പ്രതീക്ഷയോടെയാണ് കാത്തിരിക്കുന്നത്.
