പൂക്കോട് വെറ്ററിനറി സർവ്വകലാശാല വിദ്യാർത്ഥി സിദ്ധാർത്ഥിന്റെ മരണത്തിൽ പ്രതികരിച്ച നടി സീമ ജി നായർക്ക് നേരെ ഇടത് സൈബർ ആക്രമണം. സിദ്ധാർത്ഥിന്റെ മരണത്തിൽ അമർഷം അറിയിച്ചുകൊണ്ട് ഫേസ്ബുക്കിൽ പോസ്റ്റ് ഇട്ടതിനാണ് താരത്തിന് നേരെ കമ്യൂണിസ്റ്റ് പ്രൊഫൈലുകളിൽ നിന്ന് അധിക്ഷേപ പരാമർശങ്ങൾ ഉണ്ടായത്. എസ്എഫ്ഐയെ മോശമാക്കാൻ ശ്രമിക്കുന്നു എന്നു പറഞ്ഞുകൊണ്ട് വ്യാപക സൈബർ ആക്രമണം സീമ ജി നായർക്ക് നേരെ ഉണ്ടായത്. ഇതിൽ ശക്തമായി പ്രതികരിച്ച് രംഗത്തു വന്നിരിക്കുകയാണ് താരം.
പാർട്ടിയുടെ പേര് പോലും പറയാതെയാണ് താൻ കുറിപ്പ് എഴുതിയതെന്നും, എന്നിട്ട് പോലും തന്നെയും മരിച്ചുപോയ സിദ്ധാർത്ഥിനെയും ചിലർ അധിക്ഷേപിക്കുകയാണെന്നും താരം പറഞ്ഞു. അങ്ങനെയുള്ളവർക്ക് തന്റെ സ്റ്റാൻഡേർഡ് മാറ്റി വച്ച് മറുപടി കൊടുത്തിട്ടുണ്ട്. ഹിന്ദുവായി പോയതുകൊണ്ട് ഞാൻ സംഘിണി ആയി മാറുന്നുവെന്നും മനസ് വികൃതമായവരുടെ നാടായി കേരളം മാറിയെന്നും സീമ ജി നായർ പ്രതികരിച്ചു. ഇടത് സൈബർ ഇടങ്ങളിൽ നിന്ന് വ്യാപകമായ ആക്രമണങ്ങൾ നേരിട്ടതോടെ ജനങ്ങളും സീമ ജി നായർക്ക് പിന്തുണയുമായി രംഗത്തു വന്നു.
സീമ ജി നായരുടെ വാക്കുകൾ,
നമസ്ക്കാരം പ്രിയപെട്ടവരെ, രണ്ട് ദിവസം മുന്നേ സിദ്ധാർത്ഥ് എന്ന മോനെ കുറിച്ച് ഞാൻ ഒരു പോസ്റ്റ് ഇട്ടിരുന്നു. അതിൽ ഞാൻ എഴുതിയത് (രാഷ്ട്രീയ കൊലപാതകത്തെ കുറിച്ചും, ഏതു പാർട്ടി ഭരിച്ചാലും ഒത്താശ ചെയ്യാൻ ആളുണ്ടെങ്കിൽ ഇവിടെ പലതും നടക്കുമെന്നാണ്) ഒരു പാർട്ടിയുടെ പേര് പറഞ്ഞില്ല. അത് CPM ,BJP,CONGRES. ഏതും ആവട്ടെ. മഞ്ഞപിത്തമുള്ളവൻ നോക്കുന്ന ഇടം മഞ്ഞനിറം എന്ന് പറഞ്ഞപോലെ കുറച്ചുപേർ എന്റെ മെക്കിട്ടുകേറാൻ വന്നു. അവരെന്തിനാണ് ഇത്രയും ആവേശത്തോടെ പ്രതികരിച്ചത്. പ്രതികരിച്ചവരുടെ പാർട്ടിയാണ് ഇതു ചെയ്തെന്നു ഞാൻ പറഞ്ഞിട്ടില്ല. ഞാൻ നിലവാരമില്ലാതവൾ, ഊള തുടങ്ങിയ പദപ്രയോഗങ്ങൾ. അവർക്കെല്ലാം എന്റെ സ്റ്റാൻഡേർഡ് മാറ്റി വച്ചു മറുപടിയും കൊടുക്കേണ്ടി വന്നു.
കൊലപാതകം ഏതും ആവട്ടെ, രാഷ്ട്രീയമോ, ക്യാമ്പസോ ആവട്ടെ, പാർട്ടി ഏതും ആവട്ടെ, പക്ഷെ ആരുടേയും ജീവൻ എടുക്കാനുള്ള അവകാശം ആർക്കും ഇല്ല. ആര് മരിച്ചാലും, ആര് കൊന്നാലും, ആ ജീവൻ തിരികെ കൊടുക്കാൻ നമ്മുക്ക് കഴിയില്ല. രാഷ്ട്രീയ തിമിരം ബാധിച്ച ചിലർ സിദ്ധാർത്ഥിന്റെ മരണത്തെ കുറിച്ചുപോലും ഇന്നലെ മോശമായി മറുപടി ഇട്ടു. നമ്മുടെ കേരളത്തിൽ തന്നെ ഇത്രയും മനസാക്ഷി ഇല്ലാതെ എങ്ങനെ ഇവർക്കെഴുതാൻ സാധിക്കുന്നു. ഇതുവരെ എന്റെ രാഷ്ട്രീയം എന്തെന്ന് ഞാൻ പറഞ്ഞിട്ടില്ല. ഒരു പാർട്ടി മീറ്റിംഗിലും ഞാൻ പങ്കെടുത്തിട്ടില്ല. ഹിന്ദുവായി പോയതുകൊണ്ട് ഞാൻ സംഘിയായി മാറുന്നു. ആര് തെറ്റ് ചെയ്താലും തെറ്റിനെ തെറ്റായി അംഗീകരിക്കാൻ പറ്റാത്ത മനസ് വികൃതമായവരുടെ നാടായി കഴിഞ്ഞു ഈ GOD’S OWN കൺട്രി.
