മലപ്പുറം: കാട്ടുപന്നി കുറുകെ ചാടിയുണ്ടായ അുകടത്തിൽ ഓട്ടോ മറിഞ്ഞ് ഡ്രൈവർ മരിച്ചു. മലപ്പുറം മഞ്ചേരിയിലാണ് അപകടമുണ്ടായത്. ഓട്ടോ ഡ്രൈവറായ ഷഫീഖ് ആണ് മരിച്ചത്. കഴിഞ്ഞ ദിവസം രാത്രി ഒമ്പത് മണിക്കാണ് സംഭവം ന‌‌ടന്നത്. കാട്ടുപന്നി കുറുകെ ചാടിയതിനെ തുടർന്ന് വാഹനത്തിന്റെ ബ്രേക്ക് നഷ്ടമായതോടെയാണ് അപകടമുണ്ടായത്.
സംസ്ഥാനത്ത് വന്യമൃഗങ്ങളുടെ ആക്രമണങ്ങൾ തുടരുന്ന സാഹചര്യത്തിലാണ് ഇങ്ങനെയൊരു അപകട വാർത്തയും പുറത്തുവരുന്നത്. കഴിഞ്ഞ ദിവസം കാട്ടുപന്നിയെ കണ്ട് ഭയന്നോടി കിണറ്റിൽ വീണ വീട്ടമ്മ തലനാരിഴക്കാണ് രക്ഷപ്പെട്ടത്. 20 മണിക്കൂറിന് ശേഷമാണ് വീട്ടമ്മയെ കിണറ്റിൽ നിന്ന് രക്ഷപ്പെടുത്തിയത്. അന്വേഷണത്തിനിടെ ഇന്നലെ ഉച്ചയോടെ അടുത്ത പുരയിടത്തിലെ കിണറ്റിൽ നിന്നും കരച്ചിൽ കേട്ട് പരിശോധിച്ചപ്പോഴാണ് എലിസബത്തിനെ കണ്ടെത്തിയത്. ഒടുവിൽ ഫയർഫോഴ്‌സ് സംഘം സ്ഥലത്തെത്തി വീട്ടമ്മയെ കരക്കുകയറ്റുകയായിരുന്നു.
കഴിഞ്ഞ ദിവസം കോഴിക്കോട് കക്കയത്ത് കാട്ടുപോത്തിന്‍റെ ആക്രമണത്തില്‍ ഒരാളും തൃശൂര്‍ പെരിങ്ങല്‍ക്കുത്തില്‍ കാട്ടാന ആക്രമണത്തില്‍ ഒരു സ്ത്രീയും കൊല്ലപ്പെട്ടിരുന്നു. കക്കയത്ത് ആളെ കൊന്ന കാട്ടുപോത്തിനെ കണ്ടെത്തി മയക്കുവെടിവെക്കാൻ ചീഫ് വൈൽഡ് ലൈഫ് വാർഡൻ ഉത്തരവിട്ടിട്ടുണ്ട്. ജനവാസ മേഖലകളിൽ വന്യമൃഗങ്ങളെ കണ്ടാൽ ടോൾ ഫ്രീ നമ്പറിൽ വിളിക്കണമെന്ന് വനംവകുപ്പ് അറിയിച്ചു.
