ഈ മാച്ച് ബോൾ എന്റെ സമ്മാനം, ആരാധക ഹൃദയം കീഴടക്കി അശ്വിനും കുൽദീപും; വീഡിയോ കാണാം

5-ാം ടെസ്റ്റിന്റെ ഒന്നാം ഇന്നിംഗ്‌സിൽ ഇംഗ്ലണ്ടിനെ വീഴ്‌ത്തിയത് കുൽദീപിന്റെയും അശ്വിന്റെയും സ്പിൻ കെണിയായിരുന്നു. 218 റൺസ് നേടിയ ഇംഗ്ലണ്ടിനെ 57.4 ഓവറിലാണ് ഇന്ത്യ കടപുഴക്കിയത്. കുൽദീപ് 72 റൺസുകൾ വഴങ്ങി അഞ്ച് വിക്കറ്റുകൾ വീഴ്‌ത്തിയപ്പോൾ അശ്വിൻ 51 റൺസ് വിട്ടുകൊടുത്ത് നാല് വിക്കറ്റുകൾ വീഴ്‌ത്തി. എന്നാൽ കളിക്കളത്തിലെ അശ്വിന്റെയും കുൽദീപിന്റെയും പരസ്പര ബഹുമാനമാണിപ്പോൾ സമൂഹമാദ്ധ്യമങ്ങളിൽ വൈറലാകുന്നത്.

ഇന്നിംഗ്‌സിൽ അഞ്ച് വിക്കറ്റ് വീഴ്‌ത്തിയ കുൽദീപിന് ടീമംഗങ്ങൾ മാച്ച് ബോൾ കൈമാറി. എന്നാൽ തന്റെ 100-ാം ടെസ്റ്റിന് ഇറങ്ങിയ അശ്വിന് കുൽദീപ് യാദവ് ഈ ബോൾ സമ്മാനിക്കുന്നതും അശ്വിൻ ഇത് സന്തോഷത്തോടെ നിരസിക്കുന്നതും വീഡിയോയിൽ കാണാം. പിന്നാലെ ഡ്രസിംഗ് റൂമിലേക്ക് ബോളുമായി പോകുന്ന കുൽദീപിനെയും കയ്യടിച്ചുകൊണ്ട് പിന്നാലെ നടക്കുന്ന അശ്വിനെയും സ്‌റ്റേഡിയത്തിലിരുന്ന ആരാധകർ ഹർഷാരവങ്ങളോടെയാണ് ഗ്രൗണ്ടിൽ നിന്ന് പറഞ്ഞയച്ചത്. മുതിർന്ന താരത്തോടുള്ള കുൽദീപിന്റെ ബഹുമാനത്തെയും അശ്വിന്റെ നിസ്വാർത്ഥതയെയും പ്രശംസിച്ച് നിരവധി പേരാണ് സമൂഹമാദ്ധ്യമങ്ങളിൽ രംഗത്ത് വന്നത്.

𝙈𝙤𝙢𝙚𝙣𝙩𝙨 𝙇𝙞𝙠𝙚 𝙏𝙝𝙚𝙨𝙚!

R Ashwin 🤝 Kuldeep Yadav

Follow the match ▶️ https://t.co/jnMticF6fc #TeamIndia | #INDvENG | @ashwinravi99 | @imkuldeep18 | @IDFCFIRSTBank pic.twitter.com/hJyrCS6Hqh

— BCCI (@BCCI) March 7, 2024

ടോസ് നേടി ബാറ്റിംഗ് തിരഞ്ഞെടുത്ത ഇംഗ്ലണ്ടിന് തരക്കേടില്ലാത്ത തുടക്കമാണ് ഓപ്പണമാർ നൽകിയത്. എന്നാൽ കുൽദീപ് യാദവ് ഇടവേളകളിൽ വിക്കറ്റ് വീഴ്‌ത്തിയതോടെ ഇംഗ്ലണ്ട് ബാറ്റർമാർക്ക് പിടിച്ചുനിൽക്കാനായില്ല. വെറ്ററൻ താരം അശ്വിനും ഫോമായതോടെ ബാസ്‌ബോൾ വീരന്മാർക്ക് മറുപടിയുണ്ടായിരുന്നില്ല. തുടരെ വിക്കറ്റ് വീഴുമ്പോഴും സമചിത്തതയോടെ ബാറ്റ് വീശിയ ക്രോലിയാണ് ഇംഗ്ലണ്ടിനെ 100 കടത്താൻ സഹായിച്ചത്. നൂറാം ടെസ്റ്റ് കളിക്കുന്ന ജോണി ബെയ്ര്‍‌സ്റ്റോയെയും (18 പന്തിൽ 29), ജോ റൂട്ടും (56 പന്തിൽ 26) പുറത്തായതോടെ ഇംഗ്ലണ്ട് 44.2 ഓവറിൽ 175-5 എന്ന നിലയിൽ പരുങ്ങി. പിന്നീട് എല്ലാം പെട്ടെന്നായിരുന്നു.