റിലയൻസ് ഫൗണ്ടേഷൻ സ്ഥാപകയും ചെയർപേഴ്സണുമായ നിത മുകേഷ് അംബാനിക്ക് Humanitarian Award നൽകി ആദരിച്ച് മിസ് വേൾഡ് ഫൗണ്ടേഷൻ. നിത അംബാനിയുടെ സാമൂഹ്യസേവനങ്ങൾ പരിഗണിച്ചാണ് അംഗീകാരം. മിസ് വേൾഡ് ഓർഗനൈസേഷൻ സിഇഒയും ചെയർമാനുമായ ജൂലിയ മോർലിയാണ് നിതയ്ക്ക് പുരസ്കാരം സമ്മാനിച്ചത്. 28 വർഷത്തെ ഇടവേളയ്ക്ക് ശേഷം ഭാരതത്തിൽ വച്ച് നടന്ന 71-ാം ലോകസുന്ദരി മത്സരവേദിയിൽ വച്ചായിരുന്നു പുരസ്കാരദാനം. ന്യൂഡൽഹിയിലെ ജിയോ വേൾഡ് കൺവെൻഷൻ സെന്ററിലായിരുന്നു മത്സരം നടന്നത്.
നിത അംബാനി, നിങ്ങളുടെ കാരുണ്യവും ദയയും ഈ ലോകം മുഴുവൻ പ്രശസ്തമാണ്. അത്രമാത്രം പ്രവർത്തനങ്ങളാണ് നിങ്ങൾ ചെയ്യുന്നതെന്ന് പുരസ്കാരദാന വേളയിൽ ജൂലിയ മോർലി പറഞ്ഞു.
ഈ ബഹുമതി കേവലമൊരു വ്യക്തിഗത നേട്ടമായി കരുതുന്നില്ലെന്നായിരുന്നു നിത അംബാനിയുടെ പ്രതികരണം. ”നമ്മെ സമൂഹവുമായി ബന്ധിപ്പിക്കുന്ന അനുകമ്പയുടേയും സേവനത്തിന്റെയും സാക്ഷ്യമാണിത്. സത്യം, നന്മ, സൗന്ദര്യം എന്നിവയെ പ്രതിനിധീകരിക്കുന്ന സത്യം ശിവം സുന്ദരമെന്ന ഭാരതീയ തത്വം എന്റെ ജീവിതയാത്രയിലുടനീളം സ്വാധീനിക്കപ്പെട്ടിട്ടുണ്ട്.
സത്യം യാഥാർത്ഥ്യത്തെ ഉൾക്കൊള്ളുന്നു. സത്യത്തിനായുള്ള അന്വേഷണം ഒരു ആത്മീയ യാത്രയാണ്. പരിശുദ്ധിയും സമഗ്രതയും ആത്മാർത്ഥയും നേടുന്ന യാത്രയാണത്. ശിവം നമുക്കുള്ളിലെ ദൈവികതയെ പരിപോഷിപ്പിക്കുന്നു. റിലയൻസ് ഫൗണ്ടേഷന്റെ പ്രവർത്തനങ്ങളിലൂടെ ദശലക്ഷക്കണക്കിന് കുട്ടികളുടെ പുഞ്ചിരിയിൽ നിന്നും ആ ദൈവികത എനിക്ക് അനുഭവിക്കാൻ കഴിഞ്ഞിട്ടുണ്ട്. സുന്ദരം നമുക്ക് ചുറ്റുമുള്ള മനോഹാരിതയെ ആഘോഷിക്കുന്നു. ഓരോ നിമിഷത്തിലും ആനന്ദം കണ്ടെത്തുക. കൃതജ്ഞതയാൽ നിങ്ങളുടെ ഹൃദയത്തെ നിറയ്ക്കുക. നല്ല മാറ്റത്തിനുള്ള ഊർജ്ജമായി സൗന്ദര്യത്തെ ഉപയോഗിക്കുക.” നിത അംബാനി പറഞ്ഞു.
ഓരോ ഇന്ത്യക്കാരനെയും പ്രത്യേകിച്ച് സ്ത്രീകളെ ശാക്തീകരിക്കാൻ റിലയൻസ് ഫൗണ്ടേഷനിലൂടെ പരിശ്രമിച്ചുകൊണ്ടിരിക്കുകയാണ്. സ്ത്രീകൾക്ക് ചെയ്യാനാകാത്തത് ഈ ലോകത്തിന് ചെയ്യാനേ കഴിയുകയില്ലെന്നും നിത അംബാനി കൂട്ടിച്ചേർത്തു.
