തിംഫു: ദ്വിദിന സന്ദർശനത്തിനായി ഭൂട്ടാനിലെത്തിയ പ്രധാനമന്ത്രി നരേന്ദ്രമോദിയ്ക്ക് ഉജ്ജ്വല വരവേൽപ്പ് നൽകി രാജ്യം. ഭൂട്ടാൻ തലസ്ഥാനമായ തിംഫുവിലെ ഹോട്ടലിലെത്തിയ പ്രധാനമന്ത്രിയെ ഗുജറാത്തിന്റെ പാരമ്പര്യ കലയായ ഗർബാ നൃത്തം അവതരിപ്പിച്ചാണ് സ്വാഗതം ചെയ്തത്. ഗുജറാത്തിന്റെ പരമ്പരാഗത വസ്ത്രങ്ങൾ ധരിച്ചാണ് ഗർബാ നൃത്തം അവതരിപ്പിച്ചത്.
പ്രധാനമന്ത്രിയെ കാണുന്നതിനായി തിംഫുവിൽ തടിച്ചുകൂടിയ ഇന്ത്യൻ സമൂഹവുമായി അദ്ദേഹം സംവദിച്ചു. ഇതിന് ശേഷമായിരുന്നു ഗർബാ നൃത്തം അരങ്ങേറിയത്. ഹോട്ടലിൽ കാത്തുനിന്ന ഉദ്യോഗസ്ഥരെയും പ്രധാനമന്ത്രി അഭിവാദ്യം ചെയ്തു. പാരോ വിമാനത്താവളം മുതൽ തിംഫു വരെ പ്രധാനമന്ത്രിയെ വരവേൽക്കുന്നതിനായി സ്ത്രീകളും വിദ്യാർത്ഥികളും നഗരവീഥികളിൽ അണിനിരന്നിരുന്നു. പ്രധാനമന്ത്രിയെ കണ്ടതോടെ ഇന്ത്യൻ സമൂഹം ആവേശഭരിതരായി. മോദിയെ കാണാനായതിൽ അഭിമാനമുണ്ടെന്ന് ആയിരുന്നു പലരുടെയും പ്രതികരണം.
In a special welcome to PM Modi, Bhutan youngsters perform Garba at hotel in Thimphu
Read @ANI Story | https://t.co/joLYCQ6UJi#PMModi #IndiaBhutanTies #PMModiInBhutan pic.twitter.com/G14XFFIfXq
— ANI Digital (@ani_digital) March 22, 2024
ഇന്ത്യ – ഭൂട്ടാൻ ഉഭയകക്ഷി ബന്ധം ശക്തമാക്കുന്നതിന്റെ ഭാഗമായി സംഘടിപ്പിക്കുന്ന വിവിധ പരിപാടികളിൽ പ്രധാനമന്ത്രി പങ്കെടുക്കും. ഇന്ത്യയും ഭൂട്ടാനും തമ്മിലുള്ള പരസ്പര ബന്ധം ശക്തമാക്കുക, വിദേശനിക്ഷേപം ഉറപ്പാക്കുക എന്നിവ ലക്ഷ്യമിട്ടാണ് പ്രധാനമന്ത്രിയുടെ ഭൂട്ടാൻ സന്ദർശനം. ഭൂട്ടാൻ രാജാവ് ജിഗ്മേ ഖേസർ നാംഗ്യേൽ വാങ്ചുക്ക്, മുൻ രാജാവ് ജിഗ്മേ സിങ്യേ വാങ്ചുക്ക് എന്നിവരുമായി അദ്ദേഹം കൂടിക്കാഴ്ച നടത്തും. ആഗോള വിഷയങ്ങളിൽ മുതിർന്ന നേതാക്കളുമായി വിപുലമായ ചർച്ചകളും നടക്കും.