സാധാരണ 10 രൂപയ്ക്ക് നമുക്ക് രണ്ടോ മൂന്നോ നാരങ്ങ വാങ്ങാം . എന്നാലിതാ ഒമ്പത് നാരങ്ങകൾ 2.36 ലക്ഷം രൂപയ്ക്ക് ഇവിടെ ചിലർ സ്വന്തമാക്കിയിരിക്കുന്നത് .
വില്ലുപുരം ജില്ലയിലെ മുരുകൻ ക്ഷേത്രത്തിലെ ഉത്രം ഉത്സവത്തോടനുബന്ധിച്ച് നടന്ന ലേലത്തിലാണ് ഒമ്പത് നാരങ്ങകൾ 2.36 ലക്ഷം രൂപയ്ക്ക് വിറ്റു പോയത് . മുരുകൻ ക്ഷേത്രത്തിൽ എല്ലാ വർഷവും 9 ദിവസം ഉത്രം ഉത്സവം ആഘോഷിക്കാറുണ്ട് . 9 ദിവസത്തെ ആരാധനയിൽ, പുരോഹിതന്മാർ ത്രിശൂലത്തിൽ നാരങ്ങകൾ വയ്ക്കുകയും എല്ലാ ദിവസവും ആരാധിക്കുകയും ചെയ്യുന്നു.
ഈ നാരങ്ങയ്ക്ക് ഒരു പ്രത്യേക ശക്തിയുണ്ടെന്ന് വർഷങ്ങളായി ഭക്തർ വിശ്വസിക്കുന്നു. വന്ധ്യത അനുഭവിക്കുന്ന ദമ്പതികൾക്കും , ജീവിതത്തിൽ പരാജയങ്ങൾ ഏറ്റുവാങ്ങുന്നവർക്കും ഈ നാരങ്ങ ലഭിക്കുന്നത് വിജയം നൽകുമെന്നാണ് വിശ്വാസം .ഇത് കാരണം, ദമ്പതികൾ ഉൾപ്പെടെ നിരവധി പേരാണ് ഈ നാരങ്ങ സ്വന്തമാക്കാൻ ലേലത്തിൽ പങ്കെടുക്കുക .
ഈ വർഷം നടന്ന ഉത്സവത്തിൽ ആദ്യദിനം 50,500 രൂപയ്ക്കാണ് നാരങ്ങ വിറ്റത് . രണ്ടാം ദിവസം 26,500 രൂപയ്ക്കും മൂന്നാം ദിവസം 42,100 രൂപയ്ക്കും വിറ്റു. നാലാം ദിവസം 1900 രൂപ, അഞ്ചാം ദിവസം 11,000 രൂപ, ആറാം ദിവസം 34,000 രൂപ, ഏഴാം ദിവസം 24,500 രൂപ, എട്ടാം ദിവസം 13,500 രൂപ, ഒൻപതാം ദിവസം 15,000 രൂപ എന്നിങ്ങനെയുള്ള തുകകൾക്കാണ് നാരങ്ങ വിറ്റത്.
