തിരുവനന്തപുരം: മാസപ്പടി കേസിൽ നിലപാട് മാറ്റി മാത്യുകുഴൽനാടൻ. മുഖ്യമന്ത്രിക്കും മകൾ വീണാ വിജയനുമെതിരെ വിജിലൻസ് അന്വേഷണം വേണമെന്ന പഴയ നിലപാട് തിരുത്തി. മാസപ്പടിയിൽ കോടതി നേരിട്ട് അന്വേഷണം നടത്തണമെന്നാണ് ഇപ്പോഴത്തെ നിലപാട്.
കേസിൽ വിജിലൻസ് അന്വേഷണം നടത്തണമെന്നാവശ്യപ്പെട്ട് കുഴൽനാടൻ വിജിലൻസ് കോടതിയിൽ സമർപ്പിച്ച ഹർജിയിൽ ഇന്ന് ഉത്തരവ് പറയാനിരിക്കെയാണ് പുതിയ നീക്കം. ഏതെങ്കിലും ഒരു തീരുമാനത്തിൽ ഉറച്ചു നിൽക്കണമെന്ന് തിരുവനന്തപുരം വിജിലൻസ് കോടതി കുഴൽനാടന് താക്കീത് നൽകി. വിധി പറയാനായി ഹർജി ഈ മാസം 12ലേക്ക് മാറ്റി.
ഫെബ്രുവരി 29നാണ് മാത്യു കുഴൽനാടൻ മാസപ്പടി കേസിൽ വിജിലൻസ് അന്വേഷണം ആവശ്യപ്പെട്ട് ഹർജി സമർപ്പിച്ചത്. കരിമണൽ ഖനനം ചെയ്യുന്നതിനായി സിഎംആർഎൽ കമ്പനിക്ക് അനുമതി നൽകിയതിന് പ്രതിഫലമായി മുഖ്യമന്ത്രിയുടെ മകൾക്ക് മാസപ്പടി ലഭിച്ചുവെന്നാണ് ആരോപണം. മുഖ്യമന്ത്രിയ്‌ക്കും മകൾക്കുമുൾപ്പെടെ ഏഴ് പേർക്കെതിരെയായിരുന്നു അദ്ദേഹം ഹർജി സമർപ്പിച്ചത്. എന്നാൽ കേസ് ഇപ്പോൾ വിജിലൻസ് അന്വേഷിക്കേണ്ടതില്ലെന്നും കോടതി നേരിട്ട് അന്വേഷിച്ചാൽ മതിയെന്നുമാണ് മാത്യു കുഴൽനാടന്റെ വാദം.
