ലണ്ടൻ: ഇംഗ്ലണ്ട് ക്രിക്കറ്റ് ടീമിനൊപ്പം നെറ്റ്സിൽ കലക്കൻ ബാറ്റിംഗുമായി ബ്രിട്ടീഷ് പ്രധാനമന്ത്രി ഋഷി സുനക്. ഇംഗ്ലീഷ് പേസർ ജെയിംസ് ആൻഡേഴ്സണെയാണ് പ്രധാനമന്ത്രി നെറ്റ്സിൽ നേരിട്ടത്. അടുത്തിടെ ആൻഡേഴ്സൻ ടെസ്റ്റ് ക്രിക്കറ്റിൽ 700 വിക്കറ്റുകൾ നേടിയിരുന്നു. ഇംഗ്ലണ്ട് ടീമിനൊപ്പം ക്രിക്കറ്റ് കളിക്കുന്ന വീഡിയോ ഋഷി സുനക് തന്നെയാണ് തന്റെ എക്സ് ഹാൻഡിലിൽ പങ്കുവച്ചത്. ഇംഗ്ലണ്ട് ടീിന്റെ വിളിക്കായി താൻ കാത്തിരിക്കണോ എന്ന അടിക്കുറിപ്പോടെയാണ് വീഡിയോ പങ്കുവച്ചിരിക്കുന്നത്.
വീഡിയോയിൽ, ബ്രിട്ടീഷ് പ്രധാനമന്ത്രി ആൻഡേഴ്സണോട് സംസാരിക്കുന്നത് കാണാം. നിങ്ങളുടെ പന്തുകളെ നേരിടേണ്ടി വരുമെന്ന് എനിക്കറിയാമായിരുന്നു. അതുകൊണ്ട് ഈ ആഴ്ചയുടെ തുടക്കത്തിൽ നെറ്റ്സിൽ പരിശീലനത്തിനായി ഞാൻ വന്നിരുന്നു. നിങ്ങളുടെ വേഗതയ്‌ക്ക് അനുസരിച്ച് ഉയരാൻ എനിക്കായില്ല. ഇതെങ്ങനെയാണ് മുന്നോട്ട് പോകുന്നതെന്ന് നമുക്ക് നോക്കാമെന്ന് ആൻഡേഴ്സൺ മറുപടി പറയുന്നതും വീഡിയോയിൽ കാണാം.
യുവ താരങ്ങളുമായി സംസാരിക്കുകയും ചിത്രങ്ങളെടുക്കുകയും ഓട്ടോഗ്രാഫ് നൽകുകയും ചെയ്യുന്ന സുനകിനെ വീഡിയോയിൽ കാണാം. ആൻഡേഴ്സന്റെ ബോളുകളെ പ്രതിരോധിച്ച് കളിച്ച സുനകിനെ യുവതാരം ക്ലീൻ ബൗൾഡാക്കി. സുനക് പങ്കുവച്ച വീഡിയോ ഇംഗ്ലണ്ട് ടീമും ഷെയർ ചെയ്തിട്ടുണ്ട്. മോശമല്ല, നെറ്റ്സിൽ കുറച്ചുകൂടി പരിശീലിക്കേണ്ടിയിരിക്കുന്നുവെന്നാണ് അടിക്കുറിപ്പ്.
