തൃശൂർ: തൃശൂർ പൂരത്തിന് ആന എഴുന്നള്ളിപ്പുമായി ബന്ധപ്പെട്ട് നടക്കുന്ന പ്രതിസന്ധിയിൽ പ്രതികരിച്ച് മന്ത്രി കെ രാജൻ. പൂരപ്രേമികളും ആനയുടമകളും പ്രതിഷേധവുമായി രംഗത്ത് വരുമ്പോഴും തൃശൂർ പൂരം നടത്തിപ്പിന് ഒരു ആശങ്കയും നിലനിൽക്കുന്നില്ലെന്ന് ആവർത്തിക്കുകയാണ് മന്ത്രി. പൂര പ്രതിസന്ധിയുമായി ബന്ധപ്പെട്ട് മാദ്ധ്യമപ്രവർത്തകരോട് സംസാരിക്കവെയാണ് മന്ത്രിയുടെ വിശദീകരണം.
ഒരു തർക്കവും ഇനിയില്ല. ആവശ്യമായ സൗകര്യങ്ങളൊരുക്കും. പൂരപ്രേമികളും സംഘാടകരുമായി സംസാരിച്ച് ഏതെങ്കിലും തരത്തിലുള്ള ബുദ്ധിമുട്ടുകളുണ്ടോയെന്ന് അന്വേഷിക്കും. ഇന്നലെ പുറപ്പെടുവിച്ച സർക്കുലറിൽ പരാമർശിച്ചിട്ടുള്ള റീ വെരിഫിക്കേഷൻ നടപടി എടുത്തുമാറ്റാനുള്ള നീക്കങ്ങൾ ആരംഭിച്ചു. ദേവസ്വവുമായി കൂടിയാലോചിക്കും. കോടതിയുടെ ചില തെറ്റിദ്ധാരണകളൊക്കെയുണ്ടാകും. അത് പിന്നീട് പരിശോധിക്കും- കെ രാജൻ പറഞ്ഞു.
ആന എഴുന്നള്ളിപ്പിൽ കഴിഞ്ഞ ദിവസമാണ് വനംവകുപ്പ് സർക്കുലർ പുറപ്പെടുവിച്ചത്. ആനകളെ നിയന്ത്രിക്കാൻ വനംവകുപ്പിന്റെ എട്ട് ആർആർടി സംഘം വേണമെന്നതാണ് ഉത്തരവ്. വനംവകുപ്പ് ഡോക്ടർമാരും ആനകളെ പരിശോധിക്കണമെന്നും ഉത്തരവിൽ പറയുന്നു. നിബന്ധനകൾ അപ്രായോഗികമാണെന്ന് ചൂണ്ടിക്കാട്ടി പ്രതിഷേധവുമായി ദേവസ്വങ്ങളും ആനയുടമകളും രംഗത്തെത്തിയിരുന്നു.
