ഗിരീഷ് എ ഡിയുടെ സംവിധാനത്തിലെത്തിയ പ്രേമലുവിനെയും അണിയറപ്രവർത്തകരെയും പ്രശംസിച്ച് നടി നയൻതാര. ഇൻസ്റ്റഗ്രാമിലൂടെയാണ് അഭിനന്ദനം അറിയിച്ചത്. ‘നല്ല സിനിമകൾ എന്നെ ഏറെ സന്തോഷിപ്പിക്കുന്നു’ എന്നായിരുന്നു താരം കുറിച്ചത്. നസ്‍ലിന്റെ ഫോട്ടോയ്‌ക്ക് ഒപ്പമാണ് കുറിപ്പ് പങ്കുവച്ചത്.
മലയാളത്തിലെ സർപ്രൈസ് ഹിറ്റായി മാറിയ ചിത്രമാണ് പ്രേമലു. മലയാളത്തിന് പുറമേ തെലുങ്കിലും തമിഴിലും ചിത്രം വലിയ വിജയം നേടി. ഫെബ്രുവരി ഒമ്പതിന് റിലീസ് ചെയ്ത ചിത്രം ബോക്‌സോഫീസിൽ 130 കോടിയിലധികം രൂപ കളക്ട് ചെയ്തിരുന്നു. ചിത്രം ഈ മാസം 12-നാണ് ഒടിടിയിൽ എത്തിയത്.
മൗത്ത് പബ്ലിസിറ്റിയിലൂടെയാണ് ചിത്രം തിയറ്ററുകളിൽ പ്രേക്ഷകരെ ആകർഷിച്ചത്. കുടുംബ പ്രേക്ഷകരും ചിത്രം ഏറ്റെടുത്തതോടെ മികച്ച കളക്ഷൻ നേടുകയായിരുന്നു. നസ്‍ലിൻ,മമിത ബൈജു, ശ്യാം മോഹൻ, അഖില ഭാർഗവൻ, സംഗീത് പ്രതാപ്, മീനാക്ഷി രവീന്ദ്രൻ എന്നിവരാണ് ചിത്രത്തിൽ പ്രധാന വേഷങ്ങൾ അവതരിപ്പിച്ചത്.
തെലുങ്കിൽ നിന്നും ഏറ്റവും അധികം കളക്ഷൻ നേടുന്ന മലയാളം സിനിമ എന്ന റെക്കോർഡും പ്രേമലു ഇതിനോടകം സ്വന്തമാക്കിയിട്ടുണ്ട്. ബാഹുബലി, ആര്‍ആര്‍ആര്‍ തുടങ്ങിയ ചിത്രങ്ങളുടെ സംവിധായകന്‍ എസ് എസ് രാജമൗലിയുടെ മകന്‍ എസ് എസ് കാര്‍ത്തികേയയുടെ ഉടമസ്ഥതയിലുള്ള ഷോയിംഗ് ബിസിനസ് എന്ന വിതരണ കമ്പനിയാണ് പ്രേമലുവിന്റെ തെലുങ്ക് റൈറ്റ്സ് സ്വന്തമാക്കിയത്.
