ചെന്നൈ: ലോക്സഭാ തെരഞ്ഞെടുപ്പിന്റെ ഒന്നാംഘട്ട വോട്ടെടുപ്പിൽ പോളിംഗ് ബൂത്തിലെത്തി തമിഴ് സിനിമാ താരങ്ങൾ. ചെന്നൈയിലെ അതത് പോളിംഗ് ബൂത്തിലെത്തി നടൻ രജനികാന്തും ധനുഷും വോട്ട് രേഖപ്പെടുത്തി. ഇതിന്റെ ചിത്രങ്ങൾ താരങ്ങൾ സമൂഹമാദ്ധ്യമത്തിൽ പങ്കുവച്ചിട്ടുണ്ട്. ടിടികെ റോഡിലെ സെന്റ് ഫ്രാൻസിസ് സ്കൂളിലാണ് ധനുഷ് വോട്ട് രേഖപ്പെടുത്തിയത്. വോട്ട് രേഖപ്പെടുത്തിയ ശേഷം ഇരു താരങ്ങളും ജനങ്ങളെ അഭിവാദ്യം ചെയ്യുകയും മഷി പുരട്ടിയ വിരൽ ക്യാമറയ്‌ക്ക് മുന്നിൽ കാണിക്കുകയും ചെയ്തു.
അഭിനേതാക്കളായ അജിത് കുമാർ, ശിവകാർത്തികേയൻ, ഗൗതം കാർത്തിക് സവിധായകന്മാരായ സുന്ദർ സി, വെട്രിമാരൻ, ശശികുമാർ എന്നിവരും വോട്ട് രേഖപ്പെടുത്തി.
തമിഴ്‌നാട്ടിൽ 39 ലോക്സഭാ സീറ്റുകളിലേക്കാണ് ഇന്ന് ആദ്യഘട്ട തെരഞ്ഞെടുപ്പ് നടക്കുന്നത്. രാവിലെ ഏഴിന് ആരംഭിച്ച വോട്ടെടുപ്പ് വൈകിട്ട് ആറ് മണി വരെ തുടരും. ഏഴ് ഘട്ടങ്ങളിലായി നടക്കുന്ന വോട്ടെടുപ്പിൽ ഇന്ന് നടക്കുന്ന ആദ്യ ഘട്ടത്തിലാണ് ഏറ്റവും കൂടുതൽ പാർലമെന്റ് മണ്ഡലങ്ങൾ ഉൾപ്പെട്ടിരിക്കുന്നത്. 8.4 കോടി പുരുഷ വോട്ടർമാരും 8.23 കോടി സ്ത്രീ വോട്ടർമാരും 11,371 ട്രാൻസ്ജെൻഡർ വോട്ടർമാരുമാണ് ആദ്യഘട്ടത്തിൽ വോട്ട് ചെയ്യാൻ അർഹത നേടിയിരിക്കുന്നത്.
