മാളികപ്പുറം എന്ന ചിത്രത്തിലൂടെ മലയാളികളുടെ മനസിൽ ഇടംനേടിയ ബാലതാരമാണ് ദേവനന്ദ. ചിത്രത്തിൽ അയപ്പഭക്തയായി എത്തിയ ദേവനന്ദ മികച്ച പ്രകടനമായിരുന്നു കാഴ്ചവച്ചത്. സൈജു കുറിപ്പിന്റെ മകളായാണ് താരം അഭിനയിച്ചത്. ദേവനന്ദയുടെ പുതിയ ചിത്രം ‘ഗു’യിലൂടെ വീണ്ടും അച്ഛനും മകളുമായി പ്രേക്ഷകരുടെ മുന്നിലെത്തുകയാണ് ഇരുവരും. ചിത്രത്തിന്റെ റിലീസ് തീയതിയാണ് അണിയറപ്രവർത്തകർ പങ്കുവച്ചിരിക്കുന്നത്. മെയ് 17-നാണ് ചിത്രം തിയേറ്ററുകളിലെത്തുന്നത്.
ചിത്രത്തിന്റെ പോസ്റ്ററും പുറത്തുവന്നിട്ടുണ്ട്. മുമ്പിലുള്ള ഗുളികൻ തെയ്യത്തെ കണ്ട് ഭയന്ന് അച്ഛനെ വട്ടം ചുറ്റിപ്പിടിച്ചിരിക്കുന്ന പെൺകുട്ടിയാണ് പോസ്റ്ററിലുള്ളത്. കൗതുകത്തോടൊപ്പം ദുരൂഹതയും നിറയ്‌ക്കുന്നതാണ് പോസ്റ്റർ. നവാഗതനായ മനു രാധാകൃഷ്ണന്റെ സംവിധാനത്തിലൊരുങ്ങുന്ന ചിത്രം മണിയൻ പിള്ള രാജു പ്രൊഡക്ഷൻസിന്റെ ബാനറിൽ മണിയൻ പിള്ള രാജു തന്നെയാണ് നിർമിക്കുന്നത്.
ഒരു ഫാന്റസി ഹൊറർ ചിത്രമാണ് ‘ഗു’. സിനിമയുടെ ടൈറ്റിൽ പോസ്റ്റർ ഇതിനോടകം തന്നെ സമൂഹമാദ്ധ്യമങ്ങളിൽ ശ്രദ്ധ നേടിയിരുന്നു. മുത്തശ്ശനും മുത്തശ്ശിയ്‌ക്കുമൊപ്പം അവധിക്കാലം ആഘോഷിക്കാൻ എത്തുന്ന മിന്ന എന്ന പെൺകുട്ടിയായിട്ടാണ് ദേവനന്ദ സിനിമയിൽ പ്രത്യക്ഷപ്പെടുന്നത്. ഉൾഗ്രാമത്തിൽ മിന്നയ്‌ക്കും മറ്റ് കുട്ടികൾക്കും നേരിടേണ്ടി വരുന്ന ഭീതിപ്പെടുത്തുന്ന സംഭവങ്ങളാണ് ചിത്രത്തിന്റെ ഇതിവൃത്തം.
