ചെന്നൈ: വനിതാ ഹോസ്റ്റലിൽ നിന്ന് കഞ്ചാവ് കണ്ടെത്തിയ സംഭവത്തിൽ യുവതി ഉൾപ്പെടെ രണ്ട് പേർ പിടിയിൽ. ചൂളൈമേടിലെ വനിതാ ഹോസ്റ്റലിൽ താമസിക്കുന്ന ഐടി ജീവനക്കാരിയായ ഷർമിള ഇവരുടെ സുഹൃത്തും ടാക്‌സി ഡ്രൈവറുമായ സുരേഷ് എന്നിവരാണ് പിടിയിലായത്. ഇവരുടെ പക്കൽ നിന്ന് 1.3 കിലോ കഞ്ചാവ് കണ്ടെടുത്തതായും ഇത് സൂക്ഷിക്കാൻ സുരേഷ് യുവതിക്ക് നൽകുകയായിരുന്നുവെന്നും പൊലീസ് അറിയിച്ചു.
തമിഴ്‌നാട് തുറൈപാക്കത്തിന് സമീപമുള്ള ഐടി സ്ഥാപനത്തിൽ ജോലി ചെയ്യുന്ന യുവതി സ്ഥിരമായി സുരേഷിന്റെ ടാക്‌സിയിലായിരുന്നു പോയി വന്നിരുന്നത്. ഇതിനിടയിൽ ഷർമിളയ്‌ക്ക് കഞ്ചാവ് സൂക്ഷിക്കാൻ നൽകുകയായിരുന്നു. വിവിധ ഏജന്റുമാർക്ക് ഇയാൾ കഞ്ചാവ് എത്തിച്ചു നൽകിയിരുന്നതായും കഞ്ചാവ് വിൽപനയിൽ സുരേഷിനുള്ള കൂടുതൽ പങ്ക് അന്വേഷിച്ചു വരികയാണെന്നും പൊലീസ് പറഞ്ഞു. പ്രതികളെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.
