ആലപ്പുഴ: തെരഞ്ഞെടുപ്പിൽ ബിജെപി വലിയ രീതിയിലുള്ള മുന്നേറ്റം നടത്തുമെന്ന് ആലപ്പുഴ എൻഡിഎ സ്ഥാനാർത്ഥി ശോഭ സുരേന്ദ്രൻ. നല്ല ആത്മവിശ്വാസമുണ്ടെന്നും ശോഭ പറഞ്ഞു.
തീരദേശങ്ങളിൽ മുമ്പെങ്ങും കാണാത്ത തരത്തിലുള്ള വോട്ടിംഗ് ബിജെപിക്ക് ഉണ്ടായിട്ടുണ്ടെന്ന വിലയിരുത്തലാണ് പാർ‌ട്ടിക്കുള്ളത്. മണ്ഡലത്തിന്റെ വികസനത്തിന് വേണ്ടി ജനങ്ങൾ തന്നെ വിജയിപ്പിക്കും. അവർക്ക് കൊടുത്ത വാക്ക് പ്രാവർത്തികമാക്കാൻ ഇവിടെ ഓഫീസ് തുടങ്ങാനാകുമെന്ന ശുഭ പ്രതീക്ഷയിലാണ് താനെന്നും അവർ പറഞ്ഞു.
വിജയിച്ചാൽ തീരദേശത്തെ ജനങ്ങളുടെ ക്ഷേമത്തിനായി അവരുടെ ജോലിക്കാരിയായി പ്രവർത്തിക്കുമെന്ന തന്റെ വാക്കുകളെ അവർ ഉൾക്കൊണ്ടിട്ടുണ്ടെന്ന ആത്മവിശ്വാസവും ശോഭ സുരേന്ദ്രൻ പ്രകടിപ്പിച്ചു. തെരഞ്ഞെടുപ്പ് പ്രഖ്യാപിച്ചപ്പോൾ മുതൽ സ്ഥാനാർത്ഥിയെ പോലെ കഠിനമായി പ്രവർത്തിച്ചവരാണ് മാദ്ധ്യമപ്രവർത്തകരെന്നും അവർക്ക് അഭിനന്ദനം അറിയിക്കുന്നതായും ശോഭ പറഞ്ഞു.
ഗുരുവായൂരപ്പനാണ് തന്റെ പരമോന്നത നീതിപീഠം. അതുകൊണ്ട് ബിഷപ്പുമാരെ കാണാൻ പള്ളിമുറികളിൽ കയറി ചെല്ലുമ്പോൾ രാജ്മോഹൻ ഉണ്ണിത്താൻ ചെയ്തത് പോലെ നെറ്റിയിലെ കുറി മായിച്ചല്ല പോകുന്നതെന്നും അവർ പറഞ്ഞു.
