പരദൂഷണം പറയാൻ ഇഷ്ടമില്ലാത്തവർ വിരളമാണ്. കുട്ടികൾ മുതൽ മുതിർന്നവർ വരെ പ്രായഭേദമന്യേ പരദൂഷണത്തിൽ പങ്കാളികളാകാറുണ്ട്. എന്നിരുന്നാലും ഇത് പുറത്ത് പറയാൻ ആരും ഇഷ്ടപ്പെടാറില്ല. കാരണം മറ്റൊന്നുമല്ല, പരദൂഷണം പറയുന്നത് വളരെ മോശം കാര്യമായാണ് സമൂഹത്തിൽ പൊതുവെ കണക്കാക്കപ്പെടുന്നത്. എന്നാൽ ഇനി അങ്ങനെയല്ല , പരദൂഷണത്തിനും ചില അതിശയകരമായ നേട്ടങ്ങളുണ്ടെന്നാണ് വിദഗ്‌ധർ പറയുന്നത്.
ലളിതമായി പറഞ്ഞാൽ നമുക്കൊപ്പം ഇല്ലാത്ത ഒരാളിനെ പറ്റി മറ്റുള്ളവരോട് പറയുന്നതാണ് പരദൂഷണം. പറയുന്ന കാര്യങ്ങൾ വസ്തുതാപരമോ അല്ലാത്തതോ ആകാം.എന്നിരുന്നാലും കേൾക്കുന്നവരും പറയുന്നവരും ഒരുപോലെ അത് ആസ്വദിക്കാറുണ്ട്. തെറ്റായ കാര്യങ്ങൾ പ്രചരിക്കപ്പെടാനും സംസാരത്തിൽ ഉൾപ്പെട്ടിരിക്കുന്ന ആളുകളെ ഇത് ദോഷകരമായി ബാധിക്കുമെന്നുമുള്ള വശം ചൂണ്ടിക്കാട്ടിയാണ് പലരും ഇതൊരു മോശം സ്വഭാവമായി കാണുന്നത്. എന്നാൽ എല്ലാം അങ്ങനെയല്ല. പരദൂഷണം ഒരു ‘സോഷ്യൽ സ്കിൽ’ അഥവാ ഒരു കഴിവായി തന്നെയാണ് വിദഗ്‌ധർ കാണുന്നത്. പരദൂഷണത്തിന്റെ നേട്ടങ്ങൾ എന്തൊക്കെയാണെന്ന് നോക്കാം
- പരദൂഷണം വൈകാരിക ചിന്തകളുടെ ശുദ്ധീകരണത്തിന് സഹായിക്കുന്നു. അതായത് നേരിട്ടുള്ള ഏറ്റുമുട്ടലുകളില്ലാതെ വ്യക്തികളോടുള്ള നമ്മുടെ വികാരങ്ങളും നിരാശകളും പ്രകടിപ്പിക്കാൻ ഇത് അനുവദിക്കുന്നു.
- മറ്റുള്ളവരെക്കുറിച്ചുള്ള അഭിപ്രായങ്ങളും വിവരങ്ങളും പങ്കിടുന്നതിലൂടെ ആളുകൾക്കിടയിൽ അടുപ്പം വളർത്തുന്നു.
- ചെറിയ സംസാരങ്ങളിലൂടെ തന്നെ ആളുകൾക്കിടയിൽ ബന്ധം ശക്തമാകുന്നു. വൈകാരികമായ അടുപ്പം നില നിർത്താൻ പരദൂഷണം സഹായകമാകും.
- ഇത്തരം ചർച്ചകളിൽ ഭാഗമാകുന്നതിലൂടെ സംഘാംഗങ്ങൾക്കിടയിലെ വിശ്വാസ്യത വർധിക്കാൻ ഇടയാകും.
- മറ്റുള്ളവരുടെ സ്വഭാവ സവിശേഷതകളെയും പെരുമാറ്റങ്ങളെയും പറ്റി സംസാരിക്കുമ്പോൾ സാമൂഹിക നിയമങ്ങളെ പറ്റിയും ബോധവാന്മാരാകുന്നു.
- നിങ്ങളെ വ്യക്തിപരമായി സ്വാധീനിച്ചേക്കാവുന്നതരം വിവരങ്ങൾ അറിയുവാനും പരദൂഷണം സഹായകമാണ്.
- ജോലിസ്ഥലത്തെ പരദൂഷങ്ങൾ സഹപ്രവർത്തകർ തമ്മിലുള്ള ബന്ധം വികസിപ്പിക്കാൻ സഹായിക്കും.
- ജോലി സ്ഥലങ്ങളിലെ പരദൂഷണ ചർച്ചകൾ സഹ പ്രവർത്തകർക്കിടയിൽ സൗഹൃദബോധം വളർത്തുന്നു.
- കൂടാതെ ഓഫീസിലെ പ്രവർത്തനരീതികൾ, സഹപ്രവർത്തകരുടെ രാഷ്‌ട്രീയ താല്പര്യങ്ങൾ, ജോലിസ്ഥലത്തെ അലിഖിത നിയമങ്ങൾ എന്നിവയെല്ലാം മനസിലാക്കാൻ പരദൂഷണം വളരെയേറെ സഹായകമാണ്.
ഗുണങ്ങൾ ഏറെയുണ്ടെങ്കിലും മറ്റൊരാൾക്ക് ഹാനികരമല്ലാത്ത തെറ്റിദ്ധാരണ സൃഷ്ടിക്കാത്ത പരദൂഷണമാണ് പൊതുവെ പ്രോത്സാഹിപ്പിക്കപ്പെടുന്നത്.
