ലക്നൗ: അയോദ്ധ്യ രാമക്ഷേത്രത്തിൽ ദർശനം നടത്തി കേരളാ ഗവർണർ ആരിഫ് മുഹമ്മദ് ഖാൻ. ബുധനാഴ്ച രാവിലെയാണ് അദ്ദേഹം രാംലല്ലയെ ദർശിക്കാൻ രാമക്ഷേത്രത്തിലെത്തിയത്. രാംലല്ലയെ ഗവർണർ സാഷ്ടാംഗം വണങ്ങുന്ന ദൃശ്യങ്ങളും അയോദ്ധ്യാ രാമക്ഷേത്രത്തിന്റെ പ്രതിരൂപം ഏറ്റുവാങ്ങുന്ന ചിത്രവും വീഡിയോയും സോഷ്യൽ മീഡിയയിലെ ഔദ്യോഗിക പേജിൽ പങ്കുവച്ചിട്ടുണ്ട്. അയോദ്ധ്യയിൽ മുൻപും എത്തിയിട്ടുണ്ടെന്നും ശാന്തി ലഭിക്കുന്നിടത്ത് എത്താൻ കഴിഞ്ഞതിൽ സന്തോഷമുണ്ടെന്നും ഗവർണർ പ്രതികരിച്ചു. ആരിഫ് മുഹമ്മദ് ഖാൻ ആദ്യമായാണ് രാമക്ഷേത്രത്തിൽ ദർശനം നടത്തുന്നത്.
Hon’ble Governor Shri Arif Mohammed Khan at Prabhu Shri Ram Temple Ayodhya: PRO KeralaRajBhavan pic.twitter.com/wCzZCSirLt
— Kerala Governor (@KeralaGovernor) May 8, 2024
പ്രാണപ്രതിഷ്ഠയ്ക്ക് മുന്നോടിയായിട്ടായിരുന്നു ഇതിന് മുൻപ് ആരിഫ് മുഹമ്മദ് ഖാൻ അയോദ്ധ്യ സന്ദർശിച്ചത്. വൈകാതെ തന്നെ രാംലല്ലയെ ദർശിക്കാൻ എത്തുമെന്നും അദ്ദേഹം അന്ന് പ്രതികരിച്ചു. പ്രാണപ്രതിഷ്ഠാ ചടങ്ങിന് ക്ഷണമുണ്ടായിരുന്നെങ്കിലും തിരക്കുകൾ കാരണം പങ്കെടുക്കാൻ സാധിച്ചിരുന്നില്ല. രാമക്ഷേത്രം ഭാരത സംസ്കാരത്തിന്റെ ഭാഗമാണെന്നും പ്രാണപ്രതിഷ്ഠാ ചടങ്ങ് ഏറെ അഭിമാനം നൽകുന്നതാണെന്നുമായിരുന്നു ഗവർണറുടെ പ്രതികരണം. കേരളത്തിൽ മുഖ്യമന്ത്രി അടക്കമുള്ള നേതാക്കളും കോൺഗ്രസും അയോദ്ധ്യയിലെ പ്രാണപ്രതിഷ്ഠാ ചടങ്ങിനെ തള്ളിപ്പറഞ്ഞപ്പോഴായിരുന്നു ഗവർണർ തന്റെ നിലപാട് വ്യക്തമാക്കിയതെന്നതും ശ്രദ്ധേയമാണ്.