ദകർ: ബോയിംഗ് 737 വിമാനം റൺവേയിൽ നിന്ന് തെന്നിനീങ്ങി അപകടം. വിമാനത്തിലുണ്ടായിരുന്ന പത്ത് പേർക്ക് പരിക്കേറ്റു. പടിഞ്ഞാറൻ ആഫ്രിക്കൻ രാജ്യമായ സെനഗലിന്റെ തലസ്ഥാനത്ത് ദകർ എയർപോർട്ടിലാണ് സംഭവം. അപകടത്തെ തുടർന്ന് എയർപോർട്ട് അടച്ചു.
ട്രാൻസ് എയർ ഓപ്പറേറ്റ് ചെയ്യുന്ന എയർ സെനഗൽ ഫ്ലൈറ്റാണ് അപകടത്തിൽപ്പെട്ടത്. വിമാനത്തിൽ രണ്ട് പൈലറ്റുമാരും നാല് കാബിൻക്രൂ അംഗങ്ങളും അടക്കം 85 പേരുണ്ടായിരുന്നു. പരിക്കേറ്റവരെ ഉടൻ തന്നെ ആശുപത്രിയിലേക്ക് മാറ്റി. മറ്റുള്ളവർക്ക് ഹോട്ടലിൽ താമസസൗകര്യങ്ങൾ ഉറപ്പുവരുത്തിയതായും സെനഗൽ ഗതാഗതമന്ത്രി എൽ. മാലിക് അറിയിച്ചു.
ഇന്ത്യൻ സമയം രാവിലെ ആറരയോടെയാണ് അപകടമുണ്ടായത്. റൺവേയ്‌ക്ക് സമീപമുള്ള കുറ്റിക്കാടിനുള്ളിൽ വിമാനം കിടക്കുന്ന ദൃശ്യങ്ങളും പുറത്തുവന്നിട്ടുണ്ട്. വിമാനത്തിന് കേടുപാടുകൾ സംഭവിച്ചതും ദൃശ്യങ്ങളിൽ കാണാം. മാലിയിലേക്ക് പോകാൻ പുറപ്പെടുന്നതിനിടെയായിരുന്നു അപകടം നടന്നത്.
