തെലുങ്ക് താരം വിഷ്ണു മഞ്ചു നായകനാകുന്ന കണ്ണപ്പയിൽ ജോയിൻ ചെയ്ത് പ്രഭാസ്. ചിത്രത്തിൽ അതിഥി വേഷത്തിലാണ് പ്രഭാസ് എത്തുന്നത്. ഇന്ത്യൻ സിനിമയിലെ സൂപ്പർ താരങ്ങളായ അക്ഷയ്കുമാർ, മോഹൻലാൽ,ശരത്കുമാർ തുടങ്ങിയവരും ചിത്രത്തിൽ പ്രധാനവേഷങ്ങളിൽ എത്തുന്നുണ്ട്. 100 കോടി ബജറ്റിൽ ഒരുങ്ങുന്ന ചിത്രം ഒരു യഥാർത്ഥ സംഭവ കഥയെ അടിസ്ഥാനമാക്കിയാണ് ഒരുങ്ങുന്നത്.
1976 ൽ പുറത്തിറങ്ങിയ തെലുങ്ക് ചിത്രം ഭക്ത കണ്ണപ്പയ്‌ക്കുള്ള ട്രിബ്യൂട്ട് എന്ന നിലയിലാണ് കണ്ണപ്പ ഒരുങ്ങുന്നത്. കണ്ണപ്പ എന്ന ശിവ ഭക്തന്റെ കഥയാണ് ചിത്രത്തിൽ പറയുന്നത്. ചിത്രത്തിൽ അഭിനയിക്കാൻ വിഷ്ണു മഞ്ചു ഏഴ് വർഷത്തെ മുന്നൊരുക്കങ്ങൾ നടത്തിയതായാണ് വിവരം. ഹോളിവുഡ് ഛായാഗ്രാഹകൻ ഷെൽഡൻ ചാവു ആണ് കണ്ണപ്പയ്‌ക്ക് വേണ്ടി കാമറ ചലിപ്പിക്കുന്നത്.
ചിത്രത്തിൽ പരമശിവന്റെ വേഷത്തിലായിരിക്കും പ്രഭാസ് എത്തുക എന്നാണ് റിപ്പോർട്ടുകൾ. ചിത്രത്തിൽ പ്രഭാസും ഒരു പ്രധാന വേഷത്തിൽ എത്തുന്നുണ്ടെന്ന വിവരം വിഷ്ണു മഞ്ചു തന്നെയാണ് കഴിഞ്ഞ വർഷം പുറത്തുവിട്ടത്. അതേസമയം മോഹൻലാലും പ്രഭാസും ഒറ്റ ഫ്രെയ്മിൽ വരുമോ എന്ന ആകാംഷയിലാണ് മലയാളി സിനിമാപ്രേമികൾ. മുകേഷ് കുമാറാണ് ചിത്രം സംവിധാനം ചെയ്യുന്നത്.
24 ഫ്രെയിംസ് ഫാക്ടറി, എ.വി.എ എന്റർടെയ്ൻമെന്റ് എന്നീ ബാനറുകളിലാണ് ചിത്രം നിർമ്മിക്കുന്നത്. ആന്ധ്രാപ്രദേശ്, ഹൈദരാബാദ് എന്നിവടങ്ങളാണ് ചിത്രത്തിന്റെ പ്രധാന ലൊക്കേഷനുകൾ. ബോളിവുഡ് മുകേഷ് കുമാർ സിംഗ്, വിഷ്ണു മഞ്ചു, മോഹൻ ബാബു എന്നിവർ ചേർന്നാണ് സംഭാഷണം ഒരുക്കിയിരിക്കുന്നത്. മണിശർമ്മയും മലയാളത്തിന്റെ സ്റ്റീഫൻ ദേവസിയും ചേർന്നാണ് സംഗീത സംവിധാനം നിർവ്വഹിക്കുന്നത്.
