തിരുവനന്തപുരം: വയനാട് ലോക്സഭാ സീറ്റ് ഉപേക്ഷിക്കാനുളള കോൺഗ്രസ് നേതാവ് രാഹുൽ ഗാന്ധിയുടെ തീരുമാനത്തെ വിമർശിച്ച് ബിജെപി സംസ്ഥാന അധ്യക്ഷനും വയനാട്ടിലെ എൻഡിഎ സ്ഥാനാർത്ഥിയുമായിരുന്ന കെ സുരേന്ദ്രൻ. ‘ബൈ ബൈ ടാറ്റാ ഗുഡ് ബൈ ഗയാ’ എന്ന രാഹുലിന്റെ പ്രശസ്തമായ ട്രോൾ ഡയലോഗിന്റെ വീഡിയോ സമൂഹമാധ്യമങ്ങളിൽ പോസ്റ്റ് ചെയ്തായിരുന്നു കെ സുരേന്ദ്രന്റെ പ്രതികരണം.
രാഹുൽ വയനാട്ടുകാരെ വിഡ്ഢികളാക്കിയെന്നും കെ സുരേന്ദ്രൻ പറഞ്ഞു. വയനാട്ടിൽ രാഹുലിന്റെ സ്ഥാനാർത്ഥിത്വം കോൺഗ്രസ് പ്രഖ്യാപിച്ചതോടെയാണ് ബിജെപി ദേശീയ നേതൃത്വം സംസ്ഥാന അധ്യക്ഷനായ കെ സുരേന്ദ്രനെ എൻഡിഎ സ്ഥാനാർത്ഥിയായി നിയോഗിച്ചത്. രാഹുലിനെതിരായ മത്സരം ഗൗരവത്തിൽ തന്നെയാണ് കാണുന്നതെന്ന സന്ദേശമാണ് പാർട്ടി ഇതിലൂടെ നൽകിയത്. പ്രചാരണത്തിലുടനീളം വലിയ പിന്തുണയാണ് എൻഡിഎയ്ക്ക് ലഭിച്ചത്.
കഴിഞ്ഞ തവണ അമേഠിയിൽ ഉൾപ്പെടെ പരാജയപ്പെട്ടപ്പോൾ എംപി സ്ഥാനത്ത് തുടരാൻ രാഹുലിനെ സഹായിച്ചത് വയനാട്ടിലെ വിജയമായിരുന്നു. ഇക്കുറി രാഹുൽ വയനാട് കൂടാതെ അമേഠിയിലോ റായ്ബറേലിയിലോ മത്സരിക്കുമെന്ന് അഭ്യൂഹങ്ങൾ ഉണ്ടായിരുന്നുവെങ്കിലും ജനങ്ങളുടെ കണ്ണിൽ പൊടിയിടാനായി കോൺഗ്രസ് നേതൃത്വം തുടക്കത്തിൽ ഇത് നിഷേധിച്ചു. എന്നാൽ വയനാട്ടിലെ വോട്ടെടുപ്പ് കഴിഞ്ഞ് ദിവസങ്ങൾക്കുള്ളിൽ തന്നെ റായ്ബറേലിയിലെ സ്ഥാനാർത്ഥിത്വം കോൺഗ്രസ് പ്രഖ്യാപിക്കുകയായിരുന്നു.
എംപിയായിരിക്കെ രാഹുലിന്റെ അസാന്നിധ്യം വയനാട്ടിൽ വലിയ വിമർശനത്തിന് ഇടയാക്കിയിരുന്നു. ഇടയ്ക്ക് സന്ദർശകനായി വരികയും പൊതുപരിപാടികളിൽ പങ്കെടുത്ത് മടങ്ങുകയുമായിരുന്നു രീതി. ഈ വിമർശനം നിലനിൽക്കെയായിരുന്നു രണ്ടാമതും മത്സരിക്കാൻ രാഹുൽ വയനാട്ടിൽ എത്തിയത്.
2019 ഒക്ടോബറിൽ മുംബൈയിൽ നടന്ന ഒരു റാലിയിലായിരുന്നു രാഹുലിന്റെ ബൈ ബൈ ടാറ്റാ ഗുഡ് ബൈ പ്രയോഗം. ഇന്നും ട്രോളൻമാരുടെ ഇഷ്ട ഡയലോഗാണിത്.