ഗോകുൽ സുരേഷിനെ നായകനാക്കി അരുൺ ചന്തു സംവിധാനം ചെയ്ത് ജൂൺ 21ന് തിയേറ്ററുകളിൽ പ്രദർശനത്തിനെത്തിയ ചിത്രമാണ് ‘ഗഗനചാരി’. വളരെ വ്യത്യസ്തമായ പശ്ചാത്തലത്തിൽ ഒരുക്കിയിരിക്കുന്ന ചിത്രത്തിന് മികച്ച പ്രേക്ഷക പിന്തുണയാണ് ലഭിക്കുന്നത്. സിനിമ കണ്ടതിനുശേഷം നടൻ ടോവിനോ തോമസ് പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്. സിനിമ തനിക്ക് ഒരുപാട് ഇഷ്ടപ്പെട്ടുവെന്നും ഗോകുൽ സുരേഷ് നന്നായി അഭിനയിച്ചിട്ടുണ്ടെന്നും ഗോകുലിനെ ചേർത്തുപിടിച്ച് ടോവിനോ പറഞ്ഞു. ഇത്തരമൊരു പരീക്ഷണചിത്രം ഒരുക്കാൻ അസാമാന്യ ധൈര്യം വേണമെന്നും താരം പ്രതികരിച്ചു.
“ഇങ്ങനെ ഒരു ആശയം സിനിമയാക്കാൻ ആലോചിക്കുമ്പോൾ തന്നെ പലരും പേടിക്കും. പ്രത്യേകിച്ച് ഔട്ട് ഓഫ് ദി ബോക്സ് കണ്ടന്റ്. ഇതെങ്ങനെ എക്സിക്യൂട്ടീവ് ചെയ്യും എന്നാലോചിച്ച് ഭയക്കും. എങ്ങനെ ഒരു ലോകം ഉണ്ടാക്കും, സിജി എങ്ങനെ ഉപയോഗിക്കും, കഥാപാത്ര ചിത്രീകരണം എങ്ങനെ സാധ്യമാകും, ഏതാണ് കാലഘട്ടം. ഇതൊക്കെ വളരെ ബ്രില്യന്റായി സിനിമയിൽ പ്ലെയ്സ് ചെയ്തിട്ടുണ്ട്. പ്രേക്ഷകർക്കും വളരെ നല്ലൊരു എക്സ്പീരിയൻസ് ആയിരിക്കും ഗഗനചാരി. ഇങ്ങനെയൊരു ചിത്രം എടുത്തു നോക്കാൻ അസാമാന്യമായ ഒരു ധൈര്യം വേണം. ഈ സിനിമയുടെ പിന്നിൽ പ്രവർത്തിച്ചിട്ടുള്ള എല്ലാവരും അഭിനന്ദനം അർഹിക്കുന്നു. നല്ലൊരു പരീക്ഷണ ചിത്രമാണ് ഗഗനചാരി”.
“ഗോകുലിന്റെ നല്ല പെർഫോമൻസ് ആയിരുന്നു. ഗണേശേട്ടൻ ആയാലും അജുവേട്ടൻ ആയാലും നന്നായി ചെയ്തിട്ടുണ്ട്. ഞാൻ വളരെ നന്നായി ആസ്വദിച്ചു. ഇങ്ങനെയൊരു സിനിമ ട്രൈ ചെയ്തതിന് കയ്യടി അർഹിക്കുന്നു. കലക്കൻ പെർഫോമൻസ്”-ടോവിനോ തോമസ് പറഞ്ഞു.