വയനാട്: മാനന്തവാടി തലപ്പുഴയിൽ കുഴിബോംബ് കണ്ടെത്തി. മാവോയിസ്റ്റ് സാന്നിധ്യം സജീവമായുള്ള മക്കിമല കൊടക്കാടാണ് കുഴിബോംബുകൾ കണ്ടെത്തിയത്. തണ്ടർബോൾട്ട് പട്രോളിങ് നടത്തുന്ന സ്ഥലത്താണ് കുഴിബോംബ് കണ്ടെത്തിയത്.
വനം വകുപ്പ് വാച്ചർമാർ രാവിലെ ഫെൻസിംഗ് പരിശോധിക്കാൻ പോയപ്പോഴാണ് സംശയാസ്പദമായ സാഹചര്യത്തിൽ ചില വസ്തുക്കൾ കുഴിച്ചിട്ട നിലയിൽ കണ്ടെത്തിയത്. വിവരമറിയിച്ചതിനെ തുടർന്ന് പൊലീസ് സ്ഥലത്തെത്തി നടത്തിയ പരിശോധനയിലാണ് സ്‌ഫോടക വസ്തുകളാണെന്ന് മനസ്സിലായത്. സ്ഥലത്ത് പൊലീസും ബോംബ് സ്‌ക്വാഡും ക്യാമ്പ് ചെയ്യുകയാണ്.
മാവോയിസ്റ്റുകളും തണ്ടർബോൾട്ടും നേരത്തെ ഏറ്റുമുട്ടിയ പ്രദേശമാണിത്.
