ന്യൂഡൽഹി: പാരിസ് ഒളിമ്പിക്സിൽ പങ്കെടുക്കുന്ന ഇന്ത്യൻ താരങ്ങൾക്ക് ആശംസകൾ നേർന്ന് രാഷ്ട്രപതി ദ്രൗപദി മുർമു. പാർലമെന്റിന്റെ ഇരുസഭകളെയും അഭിസംബോധന ചെയ്ത രാഷ്ട്രപതി 2036-ലെ ഒളിമ്പിക്‌സിന് ആതിഥേയത്വം വഹിക്കാനുള്ള ഇന്ത്യയുടെ ശ്രമങ്ങളെ പിന്തുണച്ചു. കേന്ദ്രസർക്കാരിന്റെ പിന്തുണയിലൂടെ അന്താരാഷ്‌ട്ര മത്സരങ്ങളിൽ താരങ്ങൾ മെഡൽ നേടി രാജ്യത്തിന്റെ യശസ് ഉയർത്തിയെന്നും രാഷ്ട്രപതി കൂട്ടിച്ചേർത്തു.
‘ഒളിമ്പിക്സിൽ രാജ്യത്തെ പ്രതിനിധീകരിക്കുന്ന ഓരോ താരത്തെയും ഓർത്ത് ഞങ്ങൾ അഭിമാനിക്കുന്നു. താരങ്ങൾക്ക് ആശംസകൾ. നേട്ടങ്ങൾ ആവർത്തിക്കാനുള്ള തയ്യാറെടുപ്പിലാണ് ഇന്ത്യൻ ഒളിമ്പിക്‌സ് അസോസിയേഷൻ’. -രാഷ്ട്രപതി പറഞ്ഞു.
സൗദി അറേബ്യ, ഇന്തോനേഷ്യ, ഖത്തർ തുടങ്ങിയ രാജ്യങ്ങളും 2036-ലെ ഒളിമ്പിക്‌സിന് ആതിഥേയത്വം വഹിക്കാൻ താത്പര്യം പ്രകടിപ്പിച്ചിട്ടുണ്ട്. അന്താരാഷ്‌ട്ര ഒളിമ്പിക്‌സ് കമ്മിറ്റി തലവൻ തോമസ് ബാക്കിന്റെ പിന്തുണ ഇന്ത്യക്കുള്ളതിനാൽ രാജ്യത്തിന്റെ ഒളിമ്പിക്‌സ് ബിഡ് അംഗീകരിക്കുമെന്നാണ് പ്രതീക്ഷ.
21 ഷൂട്ടർമാർ ഉൾപ്പെടെ 100-ലധികം താരങ്ങളാണ് പാരിസ് ഒളിമ്പിക്‌സിന് ഇതുവരെ യോഗ്യത നേടിയത്. 2020-ലെ ടോക്കിയോ ഒളിമ്പിക്സിൽ ഒരു സ്വർണമുൾപ്പെടെ 7 മെഡലുകളാണ് ഇന്ത്യൻ താരങ്ങൾ സ്വന്തമാക്കിയത്.
