ന്യൂഡൽഹി: ഇൻഡിഗോ വിമാനത്തിന്റെ ശുചിമുറിയിൽ ഇരുന്ന് പുകവലിച്ച യാത്രക്കാരനെതിരെ കേസെടുത്തു. ഖലീൽ കാജമുൽ ഖാൻ എന്ന 38കാരനെതിരെയാണ് കേസ്. ജൂൺ 26ന് ഡൽഹിയിൽ നിന്ന് മുംബൈയിലേക്ക് പുറപ്പെട്ട വിമാനത്തിലാണ് സംഭവം നടന്നത്.
176 യാത്രക്കാരുമായി ഡൽഹി വിമാനത്താവളത്തിൽ നിന്ന് വൈകിട്ട് 5.15 നാണ് വിമാനം പറന്നുയർന്നത്. ഇതിനിടയിൽ ഖലീൽ ശുചിമുറിയിൽ കയറി പുകവലിക്കുകയായിരുന്നു. സെൻസറുകളിൽ നിന്ന് മുന്നറിയിപ്പ് ലഭിച്ചതിനെ തുടർന്ന് കാബിൻ ക്രൂ ജീവനക്കാർ ശുചിമുറിയിൽ കയറി പരിശോധന നടത്തി. ഇവിടെ നിന്നും സിഗററ്റ് പായ്ക്കറ്റും തീപ്പെട്ടിയും കണ്ടെടുത്തതായി ജീവനക്കാർ പറഞ്ഞു.
തുടർന്ന് നടത്തിയ ചോദ്യം ചെയ്യലിൽ പുകവലിച്ചത് ഖലീലാണെന്ന് സമ്മതിക്കുകയായിരുന്നു. മുംബൈ വിമാനത്താവളത്തിൽ വിമാനം ഇറക്കിയതിന് ശേഷം സുരക്ഷാ ഉദ്യോഗസ്ഥരെ വിവരം അറിയിക്കുകയും ഖലീലിനെ പൊലീസ് കസ്റ്റഡിയിലെടുക്കുകയും ചെയ്തു. ഇയാൾക്കെതിരെ ഇന്ത്യൻ ശിക്ഷാ നിയമപ്രകാരവും എയർക്രാഫ്റ്റ് നിയമപ്രകാരവും കേസെടുത്തിട്ടുണ്ട്.