ആന്ദ്രെ ഷ്നൂര, സാക്സോ ഫോണിലൂടെ ജർമ്മനിയുടെ ഹൃദയം കീഴടക്കിയ വ്യക്തി. സാക്സോഫോൺ സംഗീതത്തിലൂടെ യൂറോ കപ്പ് ആരാധകരുടെ ഹൃദയം കവർന്ന്, തെരുവുകളെ ഉണർത്തിയ മാന്ത്രിക നാദത്തിന് ഉടമ. ജൂലൈ 15ന് നടക്കുന്ന യൂറോ കപ്പ് ഫൈനലിൽ വേദിയെ ആവേശത്തിലാക്കാൻ ഷ്നൂരയുടെ പ്രകടനം വേണമെന്നാണ് ആരാധകരുടെ ആവശ്യം. എന്നാൽ ഇതിനോട് യൂറോപ്യൻ യൂണിയൻ ഫുട്ബോൾ അസോസിയേഷൻ ഇതുവരെയും പ്രതികരിച്ചിട്ടില്ല.
റൂഡി വോളറുടെ 9-ാം നമ്പർ ജഴ്സിയും സൺഗ്ലാസും ധരിച്ചാണ് അദ്ദേഹം തെരുവുകളെ ഉണർത്തിയത്. ജർമ്മൻ പോപ് ബാൻഡായ ബെല്ലിനിയുടെ സാമ്പ ഡി ജനേറിയോയെന്ന പാട്ട് വായിച്ച് യൂറോ കപ്പ് ആരാധകരെ കയ്യിലെടുത്തത്. യൂറോയുടെ അനൗദ്യോഗിക ഗാനമാണതെന്ന് ആരാധകരും മുദ്രകുത്തി. 1996-ലെ ഗാലയുടെ ഹിറ്റ് ഗാനമായ ഫ്രീഡ് ഫ്രം ഡിസയറും ഷ്നൂരയുടെ സാക്സോ ഫോണിലൂടെ ആരാധകരുടെ മനസിലെക്കെത്തി.
ടൂർണമെന്റ് അവസാനിക്കാതിരിക്കാൻ എന്തെങ്കിലും വഴിയുണ്ടോ?, ജീവിക്കുന്ന ഇതിഹാസം എന്നിങ്ങനെയാണ് ഇൻസ്റ്റഗ്രാമിലെ ഷ്നൂരയുടെ വീഡിയോയ്ക്ക് താഴെ വരുന്ന കമന്റുകൾ. ആരാധക പിന്തുണയ്ക്ക് ഷ്നൂര നന്ദിയും പ്രകടിപ്പിച്ചിട്ടുണ്ട്. തന്റെ കമ്പനിയായ സ്റ്റാലക്സി വഴി വിൽപ്പന നടത്തുന്ന സാക്സോഫോണുകളുടെ ലാഭത്തിൽ നിന്ന് ഈ വർഷം 160 ഡോളർ ചാരിറ്റിക്കായി നൽകുമെന്നും ഷ്നൂര പ്രഖ്യാപിച്ചിട്ടുണ്ട്.