ട്രോളാണെങ്കിലും അങ്ങനെ സംഭവിക്കണേ എന്ന് ആരാധകർ; ഫൈനലിന് മുന്നോടിയായി ചർച്ചയായി ഡൽഹി പൊലീസിന്റെ പോസ്റ്റ്

ടി20 ലോകകപ്പിലെ കലാശപ്പോരിന് ഇനി മണിക്കൂറുകൾ മാത്രമാണ് ബാക്കി. ബാർബഡോസ് സ്‌റ്റേഡിയത്തിൽ നടക്കുന്ന ഫൈനലിൽ ഇന്ത്യയുടെ എതിരാളി ദക്ഷിണാഫ്രിക്കയാണ്. 2013-ലാണ് ഇന്ത്യ അവസാനമായി ഒരു കിരീടം സ്വന്തമാക്കിയത്. 11 വർഷത്തെ കിരീട വരൾച്ചയ്‌ക്ക് ഇന്ന് അവസാനമാകണമെന്ന പ്രാർത്ഥനയാണ് ഇന്ത്യൻ ആരാധകർക്ക്. ഫൈനലിന് മുന്നോടിയായി ഇന്ത്യക്ക് ആശംസകൾ അറിയിച്ച് ഡൽഹി പൊലീസ് എക്‌സിൽ പങ്കുവച്ച ട്വീറ്റാണ് ഇപ്പോൾ സോഷ്യൽ മീഡിയയിൽ വൈറൽ.

പച്ചക്കറികൾ കഴിക്കാനാണ് അമ്മ പറയുന്നത്. ടീം ഇന്ത്യ കേൾക്കുന്നുണ്ടോയെന്നാണ് ഡൽഹി പൊലീസ് എക്‌സിൽ കുറിച്ചത്. ഇന്ത്യ പച്ചക്കറി കഴിക്കുമെന്ന് ഉറപ്പാണ്, പച്ചക്കറികൾ ആരോഗ്യത്തിന് നല്ലതാണ് എന്നിങ്ങനെയുള്ള കമന്റുകളാണ് പോസ്റ്റിന് താഴെ വരുന്നത്. ദക്ഷിണാഫ്രിക്കയെ തോൽപ്പിക്കാനാണ് പരിഹാസ രൂപേണ ഇന്ത്യൻ ടീമിനോട് ഡൽഹി പൊലീസ് ആവശ്യപ്പെട്ടത്.

Mummy kehti hain “greens khao”..

Sun rahe ho na, Team India?#INDvsSAFinal#INDvSA#INDvsSA#T20WorldCup

— Delhi Police (@DelhiPolice) June 29, 2024

“>

ഇത് ആദ്യമായല്ല ഇന്ത്യൻ ടീമിന് ആശംസകൾ നേർന്നും എതിരാളികളെ പരിഹസിച്ചും ഡൽഹി പൊലീസ് രംഗത്ത് വരുന്നത്. ടി20 ലോകകപ്പിലെ ഗ്രൂപ്പ് ഘട്ടത്തിൽ ഇന്ത്യയോട് തോറ്റ പാകിസ്താനെയും ഓസ്‌ട്രേലിയയെയും പരിഹസിച്ച് മുമ്പ് പോസ്റ്റ് പങ്കുവച്ചിരുന്നു. ”11 ഇന്ത്യൻ പുരുഷന്മാർ ഒരു ബില്യണിലധികം വരുന്ന ഹൃദയങ്ങൾ ‘മോഷ്ടിച്ചു’. പ്രാഥമികാന്വേഷണത്തിൽ 19/11 പ്രതികാരമാണെന്നാണ് തെളിയുന്നത്”. ഓസ്‌ട്രേലിയയെ പരിഹസിച്ച് കൊണ്ട് എക്‌സിൽ കുറിച്ചത് ഇങ്ങനെയാണ്.

ന്യൂയോർക്കിൽ നിന്ന് രണ്ട് ഉഗ്ര ശബ്ദങ്ങൾ ഞങ്ങൾ കേട്ടു, ഒന്ന് ഇന്ത്യ… ഇന്ത്യ എന്നായിരുന്നു, രണ്ടാമത്തേത് ടെലിവിഷൻ പൊട്ടിത്തകരുന്നതിന്റെയും. എന്തായിരുന്നു അതെന്ന് ഒന്ന് അന്വേഷിച്ച് പറയാമോ എന്നായിരുന്നു പാകിസ്താനെതിരായ ഇന്ത്യയുടെ ജയത്തിന് പിന്നാലെ എക്‌സിൽ ഡൽഹി പൊലീസ് കുറിച്ചത്.