മലയാളത്തിലെ ക്ലാസിക് ചിത്രങ്ങളിലൊന്നായ ‘ദേവദൂതൻ’ റീ റിലീസിന് എത്തുന്ന വിവരം സംവിധായകൻ സിബി മലയിൽ മുമ്പ് വെളിപ്പെടുത്തിയിരുന്നു. ആരാധകരുടെ കാത്തിരിപ്പുകൾക്ക് വിരാമം ഇട്ടുകൊണ്ട് ദേവദൂതന്റെ ഫസ്റ്റ് ലുക്ക് പോസ്റ്റർ പങ്കുവച്ചിരിക്കുകയാണ് മോഹൻലാൽ.
ആർക്കോ ആരോടോ എന്തോ പറയാനുണ്ട് എന്ന ക്യാപ്ഷനോടെയാണ് പോസ്റ്റർ പുറത്തിറക്കിയിരിക്കുന്നത്. ദേവദൂതൻ 4 കെ ഉടൻ വരുന്നു എന്ന ക്യാപ്ഷനോടെയാണ് മോഹൻലാൽ ചിത്രം പോസ്റ്റ് ചെയ്തത്. 4k ദൃശ്യമികവിലും ശബ്ദത്തിലുമാകും സിനിമ പുനരവതരിപ്പിക്കുന്നത്. 2000-ൽ റിലീസ് ചെയ്ത മിസ്റ്ററി ത്രില്ലർ ചിത്രമാണ് ദേവദൂതൻ. രഘുനാഥ് പലേരിയുടെ തിരക്കഥയിൽ ഒരുങ്ങിയ സിനിമയിൽ വിശാൽ കൃഷ്ണമൂർത്തി എന്ന കഥാപാത്രത്തെയാണ് മോഹൻലാൽ അവതരിപ്പിച്ചത്.
തിയേറ്ററിൽ ചിത്രത്തിന് മികച്ച വിജയം കൈവരിക്കാൻ സാധിച്ചില്ലെങ്കിലും പിന്നീട് സിനിമാ മേഖലയിൽ വൻ സ്വീകാര്യത ലഭിച്ച ചിത്രമാണ് ദേവദൂതൻ. 4k പതിപ്പിൽ അന്ന് ഇറങ്ങിയതിൽ നിന്നും വ്യത്യസ്തമായി റീ എഡിറ്റഡ് ആയിട്ടാവും ഇറങ്ങുകയെന്നും സിബി മലയിൽ നേരത്തെ പറഞ്ഞിരുന്നു.