ക്രിക്കറ്റിൽ നിന്നും വിരമിച്ചെങ്കിലും റോയൽ ചലഞ്ചേഴ്സ് ബെംഗളൂരുവുമായുള്ള ബന്ധം അവസാനിപ്പിക്കാതെ ദിനേശ് കാർത്തിക്. 2025-ൽ ടീമിന്റെ മെന്ററും ബാറ്റിംഗ് പരിശീലകനുമായാണ് ഡികെ ആർസിബി ടീമിൽ പുതിയ റോളിൽ എത്തുന്നത്. റോയൽ ചലഞ്ചേഴ്സ് ബെംഗളൂരു സമൂഹമാദ്ധ്യമങ്ങളിലൂടെയാണ് ഡികെയുടെ ടീമിലേക്കുള്ള തിരിച്ച് വരവ് ആരാധകരെ അറിയിച്ചത്.
ഐപിഎൽ 17-ാം സീസൺ അവസാനിച്ചതിന് പിന്നാലെയാണ് ക്രിക്കറ്റിന്റെ എല്ലാ ഫോർമാറ്റിൽ നിന്നും ദിനേശ് കാർത്തിക് വിരമിക്കൽ പ്രഖ്യാപിച്ചത്. കഴിഞ്ഞ സീസണിൽ ആർസിബിക്ക് വേണ്ടി ഫിനിഷർ റോളിൽ ഡികെ മികച്ച പ്രകടനം കാഴ്ചവച്ചിരുന്നു. പിന്നാലെയാണ് പരിശീലകനായി വരുന്നത്.
2022-ലെ മെഗാ താരലേലത്തിലൂടെയാണ് ദിനേശ് കാർത്തിക് ആർസിബിയിലേക്ക് എത്തുന്നത്. 2015, 2016 സീസണുകളിലും ആർസിബിയുടെ താരമായിരുന്നു. 2008-ലെ ആദ്യ സീസൺ മുതൽ ഐപിഎൽ കളിച്ച താരം 257 മത്സരങ്ങളിൽ 135.36 സ്ട്രൈക്ക് റേറ്റിൽ 4842 റൺസാണ് അടിച്ചുകൂട്ടിയത്. 2004-ൽ അന്താരാഷ്ട്ര അരങ്ങേറ്റം നടത്തിയ ഡി.കെ ഇന്ത്യക്ക് വേണ്ടി 96 ഏകദിനങ്ങളും 60 ടി20 മത്സരങ്ങളും 26 ടെസ്റ്റുകളും കളിച്ചിട്ടുണ്ട്. ടി20 ലോകകപ്പിന്റെ കമന്റേറ്ററുമായിരുന്നു താരം.