അമ്മയുടെ ജനറൽ ബോഡി മീറ്റിംഗിലെത്തിയ മോഹൻലാലിന്റെയും ഇന്ദ്രൻസിന്റെയും ചിത്രങ്ങളാണ് സമൂഹമാദ്ധ്യമങ്ങളിൽ ഇപ്പോൾ വൈറലാകുന്നത്. മോഹൻലാലിൽ നിന്നും സ്നേഹാദരം ഏറ്റുവാങ്ങിയതിന് ശേഷം മോഹൻലാലിന്റെ കവിളിൽ ചുംബനം നൽകുന്ന ഇന്ദ്രൻസാണ് ചിത്രത്തിലുള്ളത്.
‘ഞാൻ എല്ലാവർക്കും ഉമ്മ നൽകും എനിക്ക് തരാൻ ആരുമില്ല’ എന്ന് മോഹൻലാൽ പറഞ്ഞപ്പോഴായിരുന്നു ഇന്ദ്രൻസ് സേനഹചുംബനം നൽകിയത്. ജനറൽ ബോഡി യോഗത്തിൽ ചലച്ചിത്ര പുരസ്കാരജേതാക്കൾക്ക് ഒരുക്കിയ ആദരവിൽ ഇന്ദ്രൻസിന് ഉപഹാരം സമ്മാനിച്ചതിനുശേഷമാണ് മോഹൻലാൽ ചുംബിച്ചത്, പിന്നാലെ മോഹൻലാലിന് ഇന്ദ്രൻസും ചുംബനം നൽകുകയായിരുന്നു.
അതേസമയം, കഴിഞ്ഞ ദിവസത്തെ അമ്മയുടെ വാർഷിക പൊതുയോഗം റിപ്പോർട്ട് ചെയ്യാനെത്തിയ മാദ്ധ്യമപ്രവർത്തകരെ സംഘാടകരുടെ നേതൃത്വത്തിൽ ബൗൺസർമാർ തടഞ്ഞുവച്ചെന്നാരോപിച്ച് മാദ്ധ്യമപ്രവർത്തകർ പ്രതിഷേധവുമായി രംഗത്തെത്തി. പത്ര–ദൃശ്യമാദ്ധ്യമ പ്രതിനിധികളെ വിളിച്ചു വരുത്തി തടഞ്ഞുവയ്ക്കുകയും അധിക്ഷേപിക്കുകയും ചെയ്തതായി ചൂണ്ടിക്കാട്ടി പ്രസ്ക്ലബും സംഭവത്തിൽ പ്രതിഷേധം രേഖപ്പെടുത്തി.
സംഭവത്തിൽ ശക്തമായ പ്രതിഷേധം രേഖപ്പെടുത്തി എറണാകുളം പ്രസ് ക്ലബ് പത്രക്കുറിപ്പും പുറത്തിറക്കി. അമ്മയുടെ ജനറൽ ബോഡി മീറ്റിംഗ്
റിപ്പോർട്ട് ചെയ്യാനെത്തിയ മാദ്ധ്യമ പ്രവർത്തകരെ തടഞ്ഞു വക്കുകയും അവരെ മഴയത്ത് നിർത്തുകയും ചെയ്തു. തെരഞ്ഞെടുപ്പിനു ശേഷം സാധാരണ നടത്താറുള്ള പത്രസമ്മേളനം ഒഴിവാക്കി. അമ്മയുടെ ഭാരവാഹികൾ ഔദ്യോഗികമായി പത്രക്കുറിപ്പ് പോലും ഇതുവരെ പുറത്തിറക്കിയില്ല. 30 വർഷത്തെ പാരമ്പര്യമുള്ള ഒരു സംഘടന അംഗീകൃത ലെറ്റർപാഡിൽ തെരഞ്ഞെടുക്കപ്പെട്ട ഭാരവാഹികളുടെ വിവരങ്ങൾ നൽകാൻ പോലും തയാറാകാത്തതു പ്രതിഷേധാർഹമാണെന്നാണ് പ്രസ് ക്ലബിന്റെ പത്രക്കുറിപ്പിൽ പറയുന്നത്.