ആർആർആർ എന്ന ചിത്രത്തിന് ശേഷം രാജമൗലി സംവിധാനം ചെയ്യാൻ ഒരുങ്ങുന്നത് തെലുങ്ക് സൂപ്പർസ്റ്റാർ മഹേഷ് ബാബുവിനെ നായകനാക്കി ഒരു ആക്ഷൻ ചിത്രമാണ്. ഇന്ത്യാന ജോൺസിന്റെ മാതൃകയിലുള്ള ഒരു ആഫ്രിക്കൻ ജംഗിൾ അഡ്വഞ്ചർ ചിത്രമായിരിക്കും ഇതെന്നാണ് റിപ്പോർട്ടുകൾ. പുതിയ ചിത്രത്തിനായി എല്ലാ തയ്യാറെടുപ്പുകളും മഹേഷ് ബാബു നടത്തിക്കഴിഞ്ഞു. സിനിമയിലെ മറ്റ് അഭിനേതാക്കളുമായി ബന്ധപ്പെട്ട് പല ഊഹാപോഹങ്ങളും പ്രചരിച്ചിരുന്നു. ഇപ്പോഴിതാ, സിനിമയിലെ വില്ലൻ കഥാപാത്രമായി എത്തുന്നത് പൃഥ്വിരാജ് ആണെന്നാണ് പുറത്തുവരുന്ന റിപ്പോർട്ടുകൾ. പിങ്കി വാലയാണ് ഇത് സംബന്ധിച്ചുള്ള വാർത്ത പുറത്തുവിട്ടിരിക്കുന്നത്.
ഇതിനു മുൻപ് പ്രഭാസ് നായകനായ സലാറിലും അക്ഷയ്കുമാറും ടൈഗർ ഷെറോഫും നായകന്മാരായ ബഡേ മിയാൻ ഛോട്ടെ മിയാൻ എന്ന സിനിമയിലും പൃഥ്വിരാജ് വില്ലനായി എത്തിയിരുന്നു. സലാറിൽ മോശമല്ലാത്ത പ്രകടനമാണ് താരം കാഴ്ചവച്ചത്. എന്നാൽ, ബഡേ മിയാൻ ഛോട്ടെ മിയാൻ എന്ന ചിത്രത്തിലെ പൃഥ്വിരാജിന്റെ വില്ലൻ കഥാപാത്രം ഏറെ ട്രോളുകളിൽ നിറഞ്ഞിരുന്നു. എന്നാൽ രാജമൗലി ചിത്രത്തിലെ കഥാപാത്രം കരുത്തുറ്റതാണെന്നാണ് റിപ്പോർട്ടുകൾ. രാജമൗലി ചിത്രത്തിൽ ആദ്യമായി അഭിനയിക്കുന്നതിന്റെ ആവേശത്തിലാണ് താരം.
പുതിയ ചിത്രത്തിന്റെ തിരക്കഥ ഏകദേശം പൂർത്തിയായിട്ടുണ്ട്. സിനിമയുടെ കാസ്റ്റിങ്ങിലേക്കും പ്രീ-പ്രൊഡക്ഷൻ വർക്കുകളിലേക്കും കടന്നിരിക്കുകയാണ് അണിയറ പ്രവർത്തകർ. 2024-ന്റെ അവസാന പാദത്തിലോ 2025-ന്റെ തുടക്കത്തോടെയോ ചിത്രം തിയേറ്ററുകളിലെത്തിക്കാനാണ് എസ്എസ് രാജമൗലി ലക്ഷ്യമിടുന്നത്.