വിനീത് ശ്രീനിവാസൻ സംവിധാനം ചെയ്ത ‘വർഷങ്ങൾക്കു ശേഷം’ എന്ന സിനിമയിൽ ധ്യാൻ ശ്രീനിവാസനും പ്രണവ് മോഹൻലാലും ചെയ്ത കഥാപാത്രങ്ങൾ മോഹൻലാലും ശ്രീനിവാസനും ചെയ്താൽ നന്നായിരുന്നു എന്ന് പ്രേക്ഷകർ അഭിപ്രായപ്പെട്ടിരുന്നു. പഴയ ഹിറ്റ് കോംബോ വീണ്ടും ഒന്നിക്കണം എന്നാണ് മലയാളി പ്രേക്ഷകരുടെ ആഗ്രഹം. ഇപ്പോഴിതാ, മോഹൻലാലിനെയും ശ്രീനിവാസനെയും വെച്ച് സിനിമ ചെയ്യാൻ ആഗ്രഹമുണ്ടെന്ന് പറയുകയാണ് ധ്യാൻ ശ്രീനിവാസൻ. അതിനു പറ്റിയ കഥയുണ്ടെന്നും ഇരുവരും സമ്മതിച്ചാൽ സിനിമ സംഭവിക്കുമെന്നും ധ്യാൻ പറയുന്നു.
“അടുത്ത ഒരു സിനിമ ചെയ്യുമ്പോൾ ഞാൻ വളരെയധികം ആലോചിക്കണം. വിജയം ഉണ്ടായാലും അതൊരു ഭാരമാണ്. ‘ലവ് ആക്ഷൻ ഡ്രാമ’ ചെയ്തു കഴിഞ്ഞിട്ട് അഞ്ചുവർഷമായി. അത് തീയേറ്ററിൽ ഓടിയ സിനിമയാണ്. ഒരു തിരക്കഥാകൃത്തിനെയും സംവിധായകനെയും സംബന്ധിച്ച് ഏറ്റവും നിർണായകം രണ്ടാമത്തെ സിനിമയായിരിക്കും. രണ്ടാമത്തെ സിനിമ കൂടി കഴിഞ്ഞു കിട്ടിയാൽ ഒരു കോൺഫിഡൻസ് നമുക്ക് കിട്ടും”.
“എല്ലാത്തരത്തിലുമുള്ള പ്രേക്ഷകരെ തൃപ്തരാക്കുന്ന തരത്തിലുള്ള സിനിമ ചെയ്യുക എന്നത് എളുപ്പമല്ല. അങ്ങനെയൊരു സിനിമയായിരിക്കണം അടുത്തതായി ചെയ്യുന്നത്. ഒരു കഥ മനസ്സിലുണ്ട്. പലരുമായി സംസാരിച്ച് ഏകദേശം ആക്കി വച്ചിട്ടുണ്ട്. അടുത്തവർഷം തുടങ്ങാം എന്ന് വച്ച് നിൽക്കുകയാണ്. അടുത്തതും ഒരു റൊമാന്റിക് ചിത്രമാണ്. അച്ഛനെയും ലാൽ സാറിനെയും വെച്ച് ഒരു സിനിമ ചെയ്യാൻ ആഗ്രഹമുണ്ട്. രണ്ടുപേരും സമ്മതിച്ചാൽ ചിലപ്പോൾ നടക്കും. ഒരു കഥയുണ്ട്, പക്ഷേ ആരോടും പറഞ്ഞിട്ടില്ല”- ധ്യാൻ ശ്രീനിവാസൻ പറഞ്ഞു.
