ബെംഗളൂരു: കർണാടകയിലെ തീരദേശത്ത് മഴ ശക്തം. സ്ഥിതിഗതികൾ രൂക്ഷമായ ദക്ഷിണ കന്നഡ ജില്ലയിൽ ഇന്ന് റെഡ് അലർട്ട് പ്രഖ്യാപിച്ചു. ഉത്തര കന്നട ഉഡുപ്പി ജില്ലകളിൽ അഞ്ച് ദിവസത്തേക്ക് ഓറഞ്ച് അലർട്ടും പ്രഖ്യാപിച്ചിട്ടുണ്ട്. ബെംഗളൂരു നഗരത്തിൽ അടുത്ത 24 മണിക്കൂറിനുള്ളിൽ ശക്തമായ കാറ്റിനും മഴയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. മഴയെ തുടർന്ന് ഇന്ന് മംഗളുരു, ദക്ഷിണ കന്നഡ ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഭരണകൂടം അവധി പ്രഖ്യാപിച്ചു.
കഴിഞ്ഞ രാത്രിയിൽ നിർത്താതെ പെയ്ത മഴയിൽ മംഗളുരു നഗരം വെള്ളത്തിലായി. ഉഡുപ്പി ടൗണിലെയും പരിസര പ്രദേശങ്ങളിലെയും പല റോഡുകളിലും വെള്ളം കയറി. ബന്നൻജെ, ബെയ്ൽകെരെ, ഗുണ്ടിബെയിൽ, ബഡഗുപേട്ട എന്നിവിടങ്ങളിലെ റോഡുകളിൽ വെള്ളക്കെട്ടുണ്ടായതോടെ ഇത് ഗതാഗതത്തെ ബാധിച്ചു.സംസ്ഥാനത്ത് മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്. ഉത്തരകന്നഡയിലെ വിവിധ താലൂക്കുകളിൽ ദുരിതാശ്വാസ ക്യാമ്പുകൾ പ്രവർത്തനം ആരംഭിച്ചു.
ഉത്തര കന്നഡയിൽ കാളി നദിയുടെ ജലനിരപ്പ് അപകടകരമാം വിധം ഉയർന്നതിനാൽ കദ്ര റിസർവോയറിന്റെ നാല് ഷട്ടറുകളിൽ നിന്നുമായി 10,600 ക്യുസെക്സ് വെള്ളം തിങ്കളാഴ്ച തുറന്നുവിട്ടു.കർണാടക സംസ്ഥാന പ്രകൃതി ദുരന്ത നിരീക്ഷണ കേന്ദ്രത്തിന്റെ റിപ്പോർട്ട് അനുസരിച്ച് കഴിഞ്ഞ 36 മണിക്കൂറിൽ ദക്ഷിണ കന്നഡയിലും ഉഡുപ്പിയിലും 150 മില്ലീലിറ്ററിലധികം മഴയാണ് ലഭിച്ചത്. ഇതാണ് ഈ ജില്ലകളിലെ പ്രളയ സമാന സാഹചര്യത്തിലേക്ക് നയിച്ചതെന്നാണ് വിലയിരുത്തൽ.
