വ്യത്യസ്തമായ കഥാപാത്രങ്ങൾ തെരഞ്ഞെടുക്കുന്നതിൽ മുന്നിലാണ് ആസിഫ് അലി. ചെയ്ത വേഷങ്ങളൊക്കെ ശ്രദ്ധിക്കപ്പെടാൻ പ്രധാന കാരണവും ഇത് തന്നെ. ജൂലൈ 26-ന് പുറത്തിറങ്ങുന്ന ആസിഫ് അലി ചിത്രം ലെവൽ ക്രോസിലെ കഥാപാത്രവും ഇതിനോടകം ശ്രദ്ധ നേടിക്കഴിഞ്ഞു.
ചിത്രത്തിൽ പല്ലിലാണ് വ്യത്യസ്തത കൊണ്ടുവന്നിരിക്കുന്നത്. ലെവൽ ക്രോസിന്റെ പ്രമോഷനുമായി ബന്ധപ്പെട്ട് നടന്ന അഭിമുഖത്തിലാണ് കഥാപാത്രത്തെ കുറിച്ച് താരം സംസാരിച്ചത്.
‘ഞാൻ ചെയ്ത മറ്റു വേഷങ്ങളുമായി ഈ കഥാപാത്രത്തിന് സാമ്യം ഉണ്ടാകരുതെന്ന് നിർബന്ധം ഉണ്ടായിരുന്നു. അത് ഒരു ഡോക്ടർ ചെയ്തു തന്ന വെപ്പുപല്ലാണ്. സത്യത്തിൽ എപ്പോഴും ആ പല്ല് ഞാൻ കൊണ്ടുനടക്കുമായിരുന്നു. ഷൂട്ട് കഴിഞ്ഞാൽ ആ പല്ലും കൊണ്ടു വീട്ടിലേക്ക് വരരുതെന്നാണ് സമ പറഞ്ഞത്.
ഒരു ഡോക്ടറെ കൺസൾട്ട് ചെയ്തതിന് ശേഷം അദ്ദേഹമാണ് അത് ഡിസൈൻ ചെയ്ത് തന്നത്. അതുകൊണ്ട്, വെറുതെ എനിക്കത് ഫിക്സ് ചെയ്യാൻ പറ്റുമായിരുന്നു. അത് വെച്ച കാര്യം തന്നെ ചിലപ്പോൾ മറന്നു പോകും. ഇത്തരത്തിൽ പുതിയ കാര്യങ്ങൾ നമ്മുടെ മുഖത്ത് പരീക്ഷിക്കുമ്പോൾ വേറെ രീതിയിലുള്ള വ്യത്യസ്ഥ റിയാക്ഷനുകൾ വരും. അതുകൊണ്ട്, പരീക്ഷണങ്ങൾ എനിക്ക് ഭയങ്കര ഇഷ്ടമാണ്.’- ആസിഫ് അലി പറഞ്ഞു.
