തിരുവനന്തപുരം: കേരളത്തിൽ നിന്ന് നീറ്റ് പിജി പരീക്ഷയെഴുതുന്ന വിദ്യാർത്ഥികളുടെ ആവശ്യം അംഗീകരിച്ച് കേന്ദ്രസർക്കാർ. ഇതരസംസ്ഥാനങ്ങളിൽ നൽകിയ സെന്ററുകൾ മാറുമെന്നും സംസ്ഥാനത്ത് സെന്ററുകൾ അനുവദിക്കുമെന്നും കേന്ദ്ര ആരോഗ്യ -കുടുംബക്ഷേമ വകുപ്പ് മന്ത്രി ജെപി നദ്ദ. 5-ന് പുതിയ പരീക്ഷാ കേന്ദ്രങ്ങൾ പ്രഖ്യാപിക്കുമെന്നും കേന്ദ്രമന്ത്രി അറിയിച്ചു. ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ നടത്തിയ ഇടപെടലിന്മേലാണ് നടപടി.
കേരളത്തിൽ നീറ്റ് പരീക്ഷ കേന്ദ്രം അനുവദിച്ച നരേന്ദ്രമോദി സർക്കാരിന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ നന്ദി അറിയിച്ചു. കേരളത്തിൽ എക്‌സാം സെന്റർ അനുവദിക്കുകയെന്നത് എംബിബിഎസ് ഡോക്ടർമാരുടെ നിരന്തരമായ ആവശ്യമായിരുന്നു. ഈ ആവശ്യമുന്നയിച്ച് കേന്ദ്ര ആരോഗ്യമന്ത്രി ജെ. പി നദ്ദയ്‌ക്ക് ജൂലായ് 31 ന് നിവേദനം നൽകുകയും ഫോണിൽ സംസാരിക്കുകയും ചെയ്തിരുന്നു.
സെന്റർ അനുവദിക്കുമെന്നും 5-ന് കേന്ദ്രങ്ങൾ പ്രഖ്യാപിക്കുമെന്നും കേന്ദ്രമന്ത്രി നേരിട്ട് ഫോണിൽ വിളിച്ച് അറിയിക്കുകയായിരുന്നു. കേരളത്തിനോട് പ്രധാനമന്ത്രി നരേന്ദ്രമോദിയും ആരോഗ്യമന്ത്രി ജെ.പി നദ്ദയും കാണിക്കുന്ന കരുതലിന് മുഴുവൻ മലയാളികളുടെയും പേരിൽ നന്ദി അറിയിക്കുന്നുവെന്നും കെ.സുരേന്ദ്രൻ പറഞ്ഞു.
