ദുബായ്: യുഎഇയിലെ ബംഗ്ലാദേശ് പൗരന്മാർക്ക് മുന്നറിയിപ്പുമായി ബംഗ്ലാദേശ് എംബസി. പ്രധാനമന്ത്രി ഷെയ്ഖ് ഹസീനയുടെ രാജിയുടെ പശ്ചാത്തലത്തിൽ പ്രകോപനങ്ങൾക്ക് മുതിരരുതെന്നാണ് നിർദേശം. കഴിഞ്ഞ മാസം യുഎഇയിലെ തെരുവുകളിൽ ഇറങ്ങി പ്രതിഷേധിച്ച ബംഗ്ലാദേശ് പൗരൻമാർക്ക് കനത്ത ശിക്ഷ നൽകിയിരുന്നു.
പ്രധാനമന്ത്രി ഷെയ്ഖ് ഹസീനയുടെ രാജിയുടെ പശ്ചാത്തലത്തിലാണ് ബംഗ്ലാദേശ് എംബസിയുടെ മുന്നറിയിപ്പ്. പ്രകോപനത്തിന് മുതിരരുതെന്നും തികഞ്ഞ ആത്മസംയമനം പാലിക്കണമെന്നും യുഎഇയിലെ പൗരൻമാരോട് ബംഗ്ലാദേശ് എംബസി ആവശ്യപ്പെട്ടു. യുഎഇയിലെ നിയമങ്ങൾ അനുസരിക്കണമെന്നും അബുദാബിയിലെ എംബസിയും ദുബായ് കോൺസുലേറ്റും നിർദേശിച്ചു. യുഎഇയുടെ ദേശീയ വിമാന കമ്പനിയായ എമിറേറ്റ്സ്, ബംഗ്ലാദേശിലേക്ക് ഇന്നലെയും ഇന്നുമുള്ള സ‍ർവീസുകൾ റദ്ദാക്കിയിട്ടുണ്ട്.
കൂട്ടംകൂടുന്നതും പ്രതിഷേധ പ്രകടനം നടത്തുന്നതും മുദ്രാവാക്യം വിളിക്കുന്നതും യുഎഇ കർശനമായി നിരോധിച്ചിരിക്കുകയാണ്. പ്രതിഷേധങ്ങളുടെ വീഡിയോ പ്രചരിപ്പിക്കുന്നതിനും നിയന്ത്രണമുണ്ട്. കഴിഞ്ഞ മാസം സ്വന്തം രാജ്യത്ത് നടക്കുന്ന സംവരണ പ്രക്ഷോഭവുമായി ബന്ധപ്പെട്ട് യുഎഇയിലെ തെരുവുകളിൽ ഇറങ്ങി പ്രതിഷേധിച്ച ബംഗ്ലാദേശ് പൗരൻമാർക്ക് യുഎഇ ഭരണകൂടം കനത്ത ൃശിക്ഷ നൽകിയിരുന്നു. മൂന്നു പേർക്ക് ജീവപര്യന്തം തടവും 53 പേർക്ക് 10 വർഷം തടവും നാടുകടത്തലും ഒരാൾക്ക് 11 വർഷം തടവും നാടുകടത്തലും അബുദാബി ഫെഡറൽ അപ്പീൽ കോടതി വിധിച്ചിരുന്നു.
