ദുബായ്: യാത്രക്കാർക്ക് അവരുടെ വാഹനം സ്വയം പാർക്ക് ചെയ്യാനുള്ള അവസരമൊരുക്കി ദുബായ് രാജ്യാന്തര വിമാനത്താവളം. ഈ മാസം 15 മുതൽ സെപ്റ്റംബർ 15 വരെയാണ് ഈ സംവിധാനം ലഭ്യമാകുക. ചുരുങ്ങിയ ദിവസത്തേയ്‌ക്ക് യാത്ര ചെയ്യുന്നവർക്ക് ഏറെ ഗുണകരമായ തീരുമാനമാണിത്.
ടെർമിനൽ ഒന്നിൽ കാർ പാർക്ക്–ബിയിലും 2,3 ടെർമിനലുകളിലും സൗകര്യം ലഭ്യമാണ്. മൂന്ന് ദിവസത്തേയ്‌ക്ക് 100 ദിർഹം മാത്രമാണ് പാർക്കിങ് ഫീസ്. 7 ദിവസത്തേയ്‌ക്ക് 200 ദിർഹം, 14 ദിവത്തേയ്‌ക്ക് 300 ദിർഹം എന്നിങ്ങനെ നിരക്ക് നൽകിയാൽ മതി.
നിലവിൽ പാർക്കിംഗിന് വൻ നിരക്കാണ് ദുബായ് എയർപോർട്ടിൽ നൽകേണ്ടിയിരുന്നത്. ടെർമിനൽ 1-ൽ പാർക്കിങ് മണിക്കൂറിന് 15 ദിർഹം മുതൽ 125 ദിർഹം വരെയും ടെർമിനൽ 2-ൽ 15 മുതൽ 70 ദിർഹം വരെയും ടെർമിനൽ 3 ൽ 5 മുതൽ 125 ദിർഹം വരെയുമാണ് നിരക്ക്. പാർക്കിംഗ് സ്ഥലം നേരത്തെ ഓൺലൈനിൽ ബുക്ക് ചെയ്യാനുള്ള സൗകര്യവും ഒരുക്കിയിട്ടുണ്ട്. നിലവിൽ ഇത്തരത്തിൽ യാത്രക്കാരന് പാർക്ക് ചെയ്ത് പോകാനുള്ള സംവിധാനമില്ല. ഡ്രൈവറോ ബന്ധുക്കളോ എയർപോർട്ടിലെത്തിക്കാറാണ് പതിവ്. അതിനാണ് മാറ്റം സംഭവിക്കുന്നത്.
