തിരുവനന്തപുരം: എൽഡിഎഫ് കൺവീനർ സ്ഥാനത്ത് നിന്ന് ഇ.പി ജയരാജനെ മാറ്റിയ കാര്യം സ്ഥിരീകരിച്ച് സിപിഎം സംസ്ഥാന സെക്രട്ടറി എംവി ഗോവിന്ദൻ. പകരം ചുമതല മുൻ മന്ത്രി ടിപി രാമകൃഷ്ണന് നൽകിയെന്നും ഗോവിന്ദൻ സ്ഥിരീകരിച്ചു.
ഇടതുമുന്നണി കൺവീനർ സ്ഥാനത്ത് നിന്ന് പുറത്താക്കിയത് രണ്ട് കാരണങ്ങൾ കൊണ്ടാണെന്നും സിപിഎം സംസ്ഥാന സെക്രട്ടറി വ്യക്തമാക്കി. കൺവീനറായി പ്രവർത്തിക്കാൻ ഇപി ജയരാജന് ചില പരിമിതികളുണ്ടായിരുന്നു. തെരഞ്ഞെടുപ്പ് ദിവസം നടത്തിയ പ്രതികരണവും പ്രകാശ് ജാവദേക്കറെ കണ്ടതുമാണ് ഇപിയെ മാറ്റാൻ കാരണങ്ങൾ. ഇത് സംഘടനാ നടപടിയല്ല. തെരഞ്ഞെടുപ്പുമായി ബന്ധപ്പെട്ട് നടത്തിയ പ്രതികരണങ്ങളും മറ്റ് ‘പല വിഷയങ്ങളും’ പരിശോധിച്ചതിന്റെ ഭാഗമായാണ് ഇപിക്കെതിരായ നടപടി. ഇപി ജയരാജൻ കേന്ദ്രകമ്മിറ്റിയിൽ തുടരുമെന്നും പാർട്ടി അറിയിച്ചു.
മുകേഷ് കുറ്റാരോപിതനാണ്, കുറ്റവാളിയല്ല, പാർട്ടി മുകേഷിനെ സംരക്ഷിക്കുന്നില്ല, മാദ്ധ്യമങ്ങൾക്ക് വഴങ്ങില്ലെന്നും ഗോവിന്ദൻ പറഞ്ഞു. പികെ ശശിക്കെതിരായ നടപടിക്കൊപ്പം മണ്ണാർക്കാട് ഏരിയാ കമ്മിറ്റി പുനഃസംഘടിപ്പിക്കാൻ തീരുമാനിച്ചുവെന്നും സിപിഎം സെക്രട്ടറി അറിയിച്ചു. പികെ ശശിയെ എല്ലാ പദവികളിൽ നിന്നും ഒഴിവാക്കിയിട്ടുണ്ടെന്നും എംവി ഗോവിന്ദൻ പറഞ്ഞു.
