സർവ്വവിഘ്നങ്ങളേയും നശിപ്പിച്ച് ഐശ്വര്യം പ്രദാനം ചെയ്യുന്ന ഗണപതി ഭഗവാന്റെ വരപ്രസാദം ലഭിക്കുന്നതിന് ആഘോഷിച്ചു വരുന്ന ഉത്സവമാണ് വിനായക ചതുർത്ഥി. ശ്രീ മഹാ ഗണപതിയുടെ ജന്മദിനമാണ് വിനായക ചതുർത്ഥിയായി ആഘോഷിക്കുന്നത്. ഭാദ്രപദമാസത്തിലെ വെളുത്തപക്ഷത്തിൽ വരുന്ന ചതുർത്ഥി ദിവസമാണ് വിനായക ചതുർത്ഥി. കേരളത്തിൽ ചിങ്ങമാസത്തിലെ അത്തം നാളിൽ വരുന്ന ചതുർത്ഥി ദിനമാണ് ആചരിക്കുന്നത്.
വിനായകചതുർത്ഥി ദിവസം പ്രപഞ്ചം മുഴുവൻ ഗണേശ ഭജനത്തിൽ മുഴുകുമ്പോൾ ചാന്ദ്ര ദർശനം അരുതെന്നു വിശ്വാസമുണ്ട്. ഇത് ഒഴിവാക്കാനായി ആളുകൾ സന്ധ്യക്കു മുമ്പുതന്നെ വീട്ടിനുള്ളിൽ കയറിക്കൂടാൻ ശ്രദ്ധിക്കാറുണ്ട്. ‘ചതുർത്ഥി കണ്ടതുപോലെ’ എന്ന ചൊല്ല് തന്നെ ചാന്ദ്ര ദർശനത്തെക്കുറിച്ചുള്ള ഭയത്തിൽ നിന്നുളവായതാണ്. ഏറെ അനിഷ്ടമുളവാക്കുന്ന അശുഭകരമായ ഒന്നിനെ കണ്ടതുപോലെ എന്നാണ് ഇതുകൊണ്ടുദ്ദേശിക്കുന്നത്.
വിനായക ചതുർത്ഥി ദിവസം ചന്ദ്രനെ ദർശിച്ചാൽ വ്യാജ ആരോപണങ്ങൾ ഉണ്ടാകുമെന്നാണ് വിശ്വാസം. അതുമൂലം പൊതുജനമധ്യത്തിൽ മാനഹാനിയും ദുഃഖവും ഫലമാകും. ഈ വിശ്വാസത്തിന് പിന്നിൽ വ്യത്യസ്തമായ ഐതിഹ്യങ്ങളുണ്ട് .
ഒരുനാൾ ചതുര്‍ത്ഥി തിഥിയിൽ ഉണ്ണി ഗണപതി ഭഗവാൻ ആനന്ദനൃത്തം നടത്തുകയായിരുന്നു. വയർ കുലുക്കിയുള്ള ഉണ്ണിഗണപതിയുടെ നൃത്തം കണ്ട ചന്ദ്രൻ ഗണേശനെ പരിഹസിച്ച് ചിരിച്ചത്രേ. തന്റെ നൃത്തത്തെ അധിക്ഷേപിച്ച ചന്ദ്രനോട് ക്ഷമിക്കാൻ ഗണപതിഭഗവാൻ തയ്യാറായില്ല. ചതുര്‍ത്ഥി തിഥിയിൽ ചന്ദ്രനെ നോക്കുന്നവരെല്ലാം മാനഹാനിയും ദുഃഖവും അനുഭവിക്കുമെന്ന് ഗണപതി ഭഗവാൻ ശപിച്ചു. ഇതറിയാതെ ഒരിക്കൽ വിഷ്ണു ഭഗവാന്‍ ചന്ദ്രനെ നോക്കി ഗണേശ ശാപത്തിനിരയായി. ആകെ വിഷമിച്ചു പോയ മഹാവിഷ്ണു മഹാദേവനോട് ഒരു പരിഹാരം ആരാഞ്ഞപ്പോൾ ഗണപതി വ്രതം നോൽക്കാൻ ഉപദേശിച്ചു. ശിവന്‍ പറഞ്ഞത് പോലെ വിഷ്ണു ഗണപതി വ്രതം അനുഷ്ഠിച്ചു ദോഷം മാറ്റി എന്നാണ് പുരാണം.
വേറെ ഒരു കഥ ഇങ്ങിനെയാണ്‌ , ഒരിക്കൽ ചന്ദ്ര ലോകത്തു വെച്ച് ദേവഗണങ്ങൾക്കെല്ലാം സമൃദ്ധമായ ഒരു വിരുന്നൊരുക്കി.സദ്യയുണ്ണുന്നത് ഏറെയിഷ്ടമായ ഉണ്ണിഗണേശനാകട്ടെ വയർ നിറയെ ഭക്ഷണം കഴിച്ചു . ഗണപതിക്ക് ഏറ്റവും ഇഷ്ടമായ മോദകം വീണ്ടും വീണ്ടും കഴിക്കുകയും കുറച്ചെണ്ണം കൊണ്ടുവരാനായി ശേഖരിക്കുകയും ചെയ്തുവത്രെ. അവ കൈയിലൊതുങ്ങാതെ താഴെ വീണ് നാലുവശവും ഉരുണ്ടു പോയി. ഇത് കണ്ടപ്പോൾ ചിരിയടക്കാനാകാതെ ചന്ദ്രൻ പൊട്ടിച്ചിരിച്ചു. ഇത് പിന്നീട് കൂട്ടച്ചിരിക്ക് കാരണമായി. ഇതു കണ്ട ഗണേശൻ തന്നെ അപമാനിച്ചതായി കണക്കാക്കി ചന്ദ്രനെ ശപിച്ചു . അത് ഒരു ചതുർത്ഥി ദിനമായിരുന്നു. ഇന്നേ ദിവസം നിന്നെ കാണുന്നതു പോലും ആളുകൾക്ക് ഇഷ്ടമില്ലാതാവട്ടെ എന്നായിരുന്നു ശാപം.
വിനായക ചതുർത്ഥി ദിവസം ചന്ദ്രനെ കണ്ടതു കൊണ്ടുള്ള അപവാദത്തിൽ നിന്നും ഭഗവാൻ ശ്രീകൃഷ്ണൻ പോലും രക്ഷപെട്ടിട്ടില്ല. സ്യമന്തകം മണി മോഷ്ടിച്ചെന്നും പ്രസേനനെ കൊലചെയ്തതെന്നും ഒരു അപവാദം ഭഗവാൻ ശ്രീകൃഷ്ണൻ നേരിട്ടിരുന്നു. ചതുർത്ഥി തിഥിയിൽ ചന്ദ്രനെ കൊണ്ടാണ് ഭഗവാൻ ശ്രീകൃഷ്ണൻ ഈ അപവാദത്തിൽ പെട്ടതെന്ന് പുരാണങ്ങൾ പറയുന്നു .
ഈ വർഷം സെപ്റ്റംബർ 7 ശനിയാഴ്ചയാണ് വിനായക ചതുർത്ഥി.
ഈ വര്ഷം സെപ്റ്റംബർ 6 വെള്ളിയാഴ്ച 03 .06 PM മുതൽ സെപ്റ്റംബർ 7 ശനിയാഴ്ച 5 .43 PM വരെയാണ് ചതുർത്ഥി തിഥി വരുന്നത്.
എപ്പോഴാണ് ചാന്ദ്രദർശനം ഒഴിവാക്കേണ്ടത്?
ഇക്കുറി ചതുർത്ഥി തിഥി രണ്ടു ദിവസമായിട്ടാണ് വരുന്നത്.ചതുർത്ഥി ആചരിക്കുന്നത് സെപ്റ്റംബർ 7 നാണെങ്കിലും സെപ്റ്റംബർ 6 വെള്ളിയാഴ്ച 03 .06 PM മുതൽ ചതുർത്ഥി തിഥിയാണ്. അത് കൊണ്ട് തുടർച്ചയായി രണ്ട് ദിവസം ചന്ദ്രദർശനം ഒഴിവാക്കേണ്ടതാണ്.
ചന്ദ്രോദയം സമയങ്ങൾ
06/09/24- 8.29 am മുതൽ 8.33 pm വരെ
07/09/24- 09.11 am മുതൽ 9.10 pm വരെ
ഏവർക്കും വിനായകചതുർത്ഥി ആശംസകൾ.
