രാജ്കുമാർ റാവു, ശ്രദ്ധാ കപൂർ, അപർശക്തി ഖുറാന, അഭിഷേക് ബാനർജി, പങ്കജ് ത്രിപാഠി എന്നിവർ പ്രധാന കഥാപാത്രങ്ങളായി എത്തിയ സ്ത്രീ-2 ബോക്സോഫീസുകൾ കീഴടക്കി റെക്കോർഡ് കുതിപ്പിലേക്ക്. ഇന്ത്യയിൽ ഏറ്റവും കൂടുതൽ കളക്ഷൻ നേടിയ രണ്ടാമത്തെ ഹിന്ദി ചിത്രമെന്ന നേട്ടവും സ്വന്തമാക്കിയാണ് അവളുടെ തേരോട്ടം. ഹൊറ‍ർ കോമഡി വിഭാഗത്തിൽപ്പെടുന്ന ചിത്രം 2018-ലിറങ്ങിയ സ്ത്രീയുടെ സീക്വലാണ്.
ട്രേഡ് അനലിസ്റ്റ് തരൺ ആദർശിന്റെ കണക്കുകൾ പ്രകാരം സ്ത്രീ-2ന്റെ ആഭ്യന്തര ബോക്സ് ഓഫീസ് കളക്ഷൻ ഇപ്പോൾ ₹583.35 കോടിയാണ്. ഇതോടെ രൺബീർ കപൂർ ചിത്രം അനിമലിന്റെ ആഭ്യന്തര കളക്ഷൻ റെക്കോർഡാണ് സ്ത്രീ മറികടന്നത്. 2023 ഡിസംബർ ഒന്നിന് തീയേറ്ററുകളിലെത്തിയ അനിമലിന്റെ നെറ്റ്-ഇന്ത്യ കളക്ഷൻ ₹553.87 കോടിയായിരുന്നു. ഇനി സ്ത്രീ-2വിന് മുന്നിലുള്ളത് ഷാരൂഖ് ഖാൻ പ്രധാനവേഷത്തിലെത്തിയ ജവാൻ മാത്രമാണ്. 2023 സെപ്റ്റംബർ ഏഴിന് പുറത്തിറങ്ങിയ ജവാൻ ₹640.25 കോടിയായിരുന്നു ഇന്ത്യയിൽ നിന്ന് സ്വന്തമാക്കിയത്. നിലവിൽ ഏറ്റവുമധികം കളക്ഷൻ നേടിയ ഹിന്ദി ചിത്രം ജവാൻ ആണ്. ഈ റെക്കോർഡും സ്ത്രീ-2 മറികടന്നേക്കുമെന്നാണ് നിലവിലുള്ള കണക്കുകൾ സൂചിപ്പിക്കുന്നത്.
