രാമേശ്വരം: രാമേശ്വരത്തിനും കന്യാകുമാരിക്കും ഇടയിൽ ആത്മീയ ടൂറിസം ബോട്ട് സവാരി നടത്താനൊരുങ്ങി തമിഴ്നാട് മാരിടൈം ബോർഡ് . ഇതിനായി 13 കോടി രൂപ ചെലവിൽ രാമേശ്വരം കടലിൽ ഫ്ലോട്ടിങ് ജെട്ടി പാലത്തിന്റെ നിർമാണം ഉടൻ ആരംഭിക്കും.
കേന്ദ്രസർക്കാരിന്റെ സാഗർ മാല പദ്ധതി പ്രകാരം ആയിരിക്കും സർവീസ് തുടങ്ങുക.
കേന്ദ്രസർക്കാർ കഴിഞ്ഞ വർഷം ഒക്‌ടോബർ. 14-ന് നാഗായിക്കും ശ്രീലങ്ക കാങ്കേശൻതുറൈയ്‌ക്കും ഇടയിൽ പാസഞ്ചർ ഷിപ്പിംഗ് ആരംഭിച്ചിരുന്നു.
ആദ്യഘട്ടത്തിൽ കേന്ദ്രസർക്കാരിന്റെ സാഗർ മാല പദ്ധതി പ്രകാരം തമിഴ്നാട് മാരിടൈം ബോർഡ് വഴി ഹ്രസ്വദൂര ടൂറിസ്റ്റ് ബോട്ട് സവാരി ആരംഭിക്കാനാണ് അധികൃതരുടെ തീരുമാനം. ഇതിന്റെ അടിസ്ഥാനത്തിൽ അഗ്നിതീർഥക് ബീച്ച് മുതൽ ധനുഷ്കോടി വരെയും വില്ലുണ്ടി തീർഥം മുതൽ ദേവീപട്ടണം വരെയും ബോട്ട് സവാരി ആരംഭിക്കും.
ഇതിനായി രാമേശ്വരം അഗ്‌നി തീർഥക് ബീച്ചിൽ ഫ്‌ളോട്ടിങ് ബ്രിഡ്ജ് നിർമിക്കുന്നതിന് ആറ് കോടി രൂപയും തങ്കച്ചിമഠം വില്ലുണ്ടി തീർഥക്കടലിൽ ഫ്‌ളോട്ടിങ് പാലം നിർമിക്കുന്നതിന് ഏഴു കോടിയോളം രൂപയും വകയിരുത്തി. രണ്ടിടത്തും ഫ്ലോട്ടിങ് ജെട്ടി പാലത്തിന്റെ നിർമാണം ഉടൻ ആരംഭിക്കുമെന്ന് തമിഴ്നാട് മാരിടൈം ബോർഡ് അധികൃതർ പറഞ്ഞു.
ലോകമെമ്പാടുമുള്ള വിനോദസഞ്ചാരികളും ആത്മീയ ഭക്തരും സന്ദർശിക്കുന്ന പ്രധാന സ്ഥലങ്ങളിൽ ഒന്നായ രാമേശ്വരം ദ്വീപിൽ മറൈൻ ടൂറിസം പ്രോത്സാഹിപ്പിക്കുന്നതിനുള്ള പദ്ധതികൾ വരുന്നത് വിനോദസഞ്ചാരികൾക്ക് ഏറെ സന്തോഷം പകരുന്ന വാർത്തയാണ്. വൻ കരയിലെ മണ്ഡപത്തെയും രാമേശ്വരത്തെയും ബന്ധിപ്പിക്കുന്ന പാമ്പൻ പുതിയ പാലത്തിന്റെ നിർമ്മാണം ഏതാണ്ട് പൂർത്തിയായിക്കഴിഞ്ഞു.
കടൽത്തീരത്തിന്റെയും ജലപാതകളുടെയും സാധ്യതകൾ ഉപയോഗിച്ച് രാജ്യത്തിന്റെ ലോജിസ്റ്റിക് മേഖല മെച്ചപ്പെടുത്തുന്നതിനുള്ള ഭാരത സർക്കാർ സംരംഭമാണ് സാഗർമാല പ്രോഗ്രാം.
Photo: https://rameswaramtourism.com/
