ശരീരത്തിൽ ജലാംശം നിലനിർത്തുകയെന്നത് വളരെ പ്രധാനപ്പെട്ട കാര്യമാണ്. വെള്ളം കുടിച്ചില്ലെങ്കിൽ പലവിധ ആരോഗ്യ പ്രശ്നങ്ങളെ അലട്ടും. ഒരു ദിവസം എത്രത്തോളം വെള്ളം കുടിക്കണമെന്നത് പലർക്കും അറിയില്ലാത്ത കാര്യമാണ്.
വെറുതെ വെള്ളം കുടിക്കാൻ താത്പര്യമില്ലാത്തവരായിരിക്കും പലരും. പ്രതിവിധിയായി നാരങ്ങാ നീരോ പുതിനയിലയോ ചായപ്പൊടിയോ ഒക്കെ ചേർത്ത് കുടിക്കും. ചിലപ്പോൾ ഊർജ്ജം കുറയുന്നത് പോലെ തോന്നുമ്പോഴും തലവേദന അനുഭവപ്പെടുമ്പോഴുമൊക്കെ വെള്ളം കുടിക്കാൻ നിർദ്ദേശിക്കാറുണ്ട്. ശരീരത്തിന്റെ 60 ശതമാനത്തോളം വെള്ളമാണ്. ആവശ്യത്തിന് വെള്ളം ശരീരത്തിന് ലഭിക്കാത്തപ്പോഴാണ് ഇത്തരം ലക്ഷണങ്ങൾ കാണിക്കുന്നത്. നിർജ്ജലീകരണത്തെ തടയുകയാണ് വേണ്ടത്.
പ്രായം, ശരീരഭാരം, കാലാവസ്ഥ തുടങ്ങിയവ ശരീരത്തിലെ ജലാംശത്തെ സ്വാധീനിക്കുന്നു. വെള്ളം കുടിക്കുന്നതിനൊപ്പം തന്നെ ജലാംശം അടങ്ങിയ ആഹാരങ്ങളും കഴിക്കുന്നത് നിർജലീകരണത്തെ തടയാൻ സഹായിക്കും. തണ്ണിമത്തൻ, സ്ട്രോബെറി, മുന്തിരി, ഓറഞ്ച്, മുന്തിരി തുടങ്ങിയ പഴങ്ങളും വെള്ളരിക്കാ, തക്കാളി, ചീര, സെലറി, കാരറ്റ് തുടങ്ങിയ പച്ചക്കറികളും സൂപ്പും പായസവും തൈരും മോരുമൊക്കെ കഴിക്കുന്നച് ജലാംശം നിലനിർത്താൻ സഹായിക്കും.
ജലാംശം നൽകുന്ന ഭക്ഷണങ്ങൾ മൂന്ന് നോരവും കഴിക്കാൻ ശ്രമിക്കുക. പ്രഭാത ഭക്ഷണമായി ഓട്സും ബെറികളും കഴിക്കാം. അല്ലെങ്കിൽ പഴങ്ങളും യോഗർട്ടും ചേർത്ത സ്മൂത്തികളും കഴിക്കാം. സ്നാക്സിന് പകരം പച്ചക്കറികളും പഴങ്ങളും കഴിക്കുക. കുക്കുമ്പർ, തക്കാളി തുടങ്ങിയവ ചേർത്ത സലാഡുകളും സാൻവിച്ചും കഴിക്കാം. ജ്യൂസായും പഴങ്ങൾ കുടിക്കാം.
പഞ്ചസാര ചേർത്ത് പഴച്ചാറുകൾ കുടിക്കാതിരിക്കുന്നതാണ് നല്ലത്. പകരം നാരങ്ങ, ഓറഞ്ച്, സ്ട്രോബെറി, റാസ്ബെറി, ബ്ലൂബെറി, തുളസി, റോസ്മേരി, ലാവെൻഡർ, കുക്കുമ്പർ, ഇഞ്ചി, കറുവാപ്പട്ട, മഞ്ഞൾ, ഏലയ്‌ക്ക എന്നിവ ചേർത്ത വെള്ളം കുടിക്കുന്നതും നല്ലതാണ്. മധുരമില്ലെങ്കിലും ഉന്മേഷദായകമായിരിക്കും.
