എറണാകുളം: ഹേമ കമ്മിറ്റി റിപ്പോർട്ടിലെ തുടർ നടപടികൾ മുദ്രവച്ച കവറിൽ ഹൈക്കോടതിയ്‌ക്ക് കൈമാറി പ്രത്യേക അന്വേഷണ സംഘം. മൊഴി നൽകിയവർക്ക് പരാതിയുമായി മുന്നോട്ട് പോകാൻ താത്പര്യമില്ലെങ്കിൽ നിർബന്ധിക്കരുതെന്ന് ഹൈക്കോടതി നിർദേശിച്ചു. സിനിമാ മേഖലയെ മാത്രമല്ല, സംസ്ഥാനത്തെ എല്ലാ മേഖലകളെയും ഉൾക്കൊള്ളുന്നതാകണം നിയമമെന്നും ചൂഷണങ്ങൾ അവസാനിപ്പിക്കണമെന്നും കോടതി വ്യക്തമാക്കി.
വിനോദ മേഖലയിൽ നിയമനിർമാണം വേണമെന്ന് വനിതാ കമ്മീഷൻ കോടതിയെ അറിയിച്ചു. ജസ്റ്റിസുമാരായ ജയശങ്കർ നമ്പ്യാർ, സി എസ് സുധ എന്നിവരടങ്ങുന്ന ബെഞ്ചാണ് റിപ്പോർട്ട് പരിഗണിച്ചത്. സിനിമാ മേഖലയിലെ പൊതുവായ പ്രശ്നങ്ങളിലാണ് കോടതി ശ്രദ്ധകേന്ദ്രീകരിക്കുന്നതെന്നും നിലവിൽ വ്യക്തിഗത വിഷയങ്ങൾ പരിഗണിക്കുന്നില്ലെന്നും ഹൈക്കോടതി ചൂണ്ടിക്കാട്ടി. സ്ത്രീകൾക്ക് തൊഴിലിടങ്ങളിൽ ഒരുക്കേണ്ട സൗകര്യങ്ങൾക്ക് പ്രാധാന്യം നൽകണമെന്നും കോടതി നിർദേശിച്ചു.
വിനോദ മേഖലയിൽ പ്രവർത്തിക്കുന്നവർക്ക് സമത്വം ഉറപ്പുവരുത്തുന്ന വ്യവസ്ഥകൾ ഉൾപ്പെടുത്തികൊണ്ടാവും പുതിയ നിയമമെന്ന് വനിതാ കമ്മീഷൻ കോടതിയെ അറിയിച്ചിട്ടുണ്ട്. സംഗീതം, സിനിമ, ടെലിവിഷൻ, നാടകം, സർക്കസ്, ഫാഷൻ എന്നിവ നിയമത്തിന്റെ പരിധിയിൽ വരും. ലൈംഗികാതിക്രമം പോലുളള സംഭവങ്ങൾ പൂർണമായി അവസാനിപ്പിക്കുക എന്നതാണ് പ്രധാനമായും ലക്ഷ്യമിടുന്നത്.
