കണ്ണൂര്: വൈക്കം സത്യഗ്രഹ സമരത്തിന്റെ മുന്നിര പോരാളി കണ്ണൂർ പാലക്കുഴ കീഴേട്ട് ഇല്ലത്ത് രാമന് ഇളയതിന്റെ മക്കൾ ഇനി വാടകവീട്ടിൽ കഴിയണ്ട. സഹോദരിമാരായ സാവിത്രി അന്തര്ജനത്തിനും സരോജിനി അന്തര്ജനത്തിനും സ്വന്തം പേരിൽ ഭൂമിയായി. ഇവര്ക്കു വീടുവയ്ക്കാന് പാണപ്പുഴ ഭൂദാനം ഭൂമിയില് കേരള സര്വോദയ മണ്ഡലം 20 സെന്റ് സ്ഥലം നല്കി.
കേരള നവോത്ഥാനത്തിനുവേണ്ടി സഹനസമരം നടത്തിയ രാമന് ഇളയതിന്റെ മക്കള്
ദുരിതജീവിതം നയിക്കുന്നതിനെക്കുറിച്ച് ജന്മഭൂമി വാര്ഷിക പതിപ്പില് ലേഖനം പ്രസിദ്ധീകരിച്ചിരുന്നു. തളിപ്പറമ്പ് കീഴാറ്റൂരില് വാടകവീട്ടിലായിരുന്നു കാലങ്ങളായി ഇവരുടെ ജീവിതം. ഇവരുടെ ഇരുട്ടുനിറഞ്ഞ ജീവിതം വായിച്ചറിഞ്ഞ ഒട്ടേറെപ്പേര് സഹായിക്കാനെത്തി. വീടുവയ്ക്കാന് സ്ഥലം കേരള സര്വോദയ മണ്ഡലം നൽകിയപ്പോൾ വീടുനിര്മാണത്തിന് സഹായഹസ്തവുമായി മറ്റൊരു സംഘടന മുന്നോട്ടു വന്നു.
കണ്ണൂരില് നടന്ന ചടങ്ങില് കെ. സുധാകരന് എംപി ഭൂമിയുടെ രേഖ സാവിത്രി അന്തര്ജനത്തിന് കൈമാറി. സരോജിനി അന്തര്ജനത്തിന്റെ മകന് അനില്കുമാറിനൊപ്പമാണ് അവര് ചടങ്ങിനെത്തിയത്.
