സ്വപ്നം കാണുക, അതോർത്ത് വയ്‌ക്കുക, സ്വപ്നത്തിൽ കണ്ട കാര്യങ്ങൾ യഥാർത്ഥ ജീവിതത്തിൽ സംഭവിക്കുക എന്നതെല്ലാം വളരെ നിഗൂഢമായി കരുതുന്ന കാര്യങ്ങളാണ്. ക്രിസ്റ്റഫർ നോളന്റെ സിനിമകളിലൂടെയും മറ്റ് സയൻസ് ഫിക്ഷൻ ചിത്രങ്ങളിലൂടെയും ലൂസിഡ് ഡ്രീമിംഗിന്റെ പല തലങ്ങൾ കാണാൻ കഴിഞ്ഞിട്ടുണ്ട്. കിടന്നുറങ്ങുന്ന രണ്ട് വ്യക്തികൾ സ്വപ്നം (lucid dreaming) കാണുകയും ആ സ്വപ്നത്തിൽ ഇരുവരും ആശയവിനിമയം നടത്തുകയും ചെയ്താലോ? അസംഭവ്യമെന്ന് തോന്നുന്ന കാര്യം വിജയകരമായി നടത്തിയിരിക്കുകയാണ് കാലിഫോർണിയയിലെ ഒരുകൂട്ടം ഗവേഷകർ.
എന്താണ് ലൂസിഡ് ഡ്രീമിംഗ്..
സ്വപ്നം കാണുകയാണെന്ന ഉത്തമബോധ്യത്തോടെ കാണുന്ന സ്വപ്നങ്ങളെയാണ് ലൂസിഡ് ഡ്രീമിംഗ് എന്ന് വിശേഷിപ്പിക്കുന്നത്. മാത്രവുമല്ല, ലൂസിഡ് ഡ്രീമിംഗിലാണെങ്കിൽ സ്വപ്നത്തെ, നമുക്ക് നിയന്ത്രിക്കാൻ കഴിയുമെന്നതാണ് മറ്റൊരു പ്രത്യേകത. നിരന്തരമായ പരിശീലനങ്ങളിലൂടെ ലൂസിഡ് ഡ്രീമിംഗ് കാണാനുള്ള കഴിവ് സ്വായത്തമാക്കുകയും ചെയ്യാം.
ഉറങ്ങിക്കിടക്കുന്ന രണ്ട് പേർ തമ്മിൽ ആശയവിനിമയം സാധ്യമാക്കിയ പരീക്ഷണം നിലവിൽ നടത്തിയത് REMspace എന്ന സ്റ്റാർട്ടപ്പ് കമ്പനിയിലെ ഗവേഷകരാണ്. ഉറക്കവും ലൂസിഡ് ഡ്രീമിംഗും ത്വരിതപ്പെടുത്താൻ സാങ്കേതികവിദ്യകൾ വികസിപ്പിക്കുന്ന കമ്പനിയാണിത്. സെപ്റ്റംബർ 24-നായിരുന്നു പരീക്ഷണം വിജയകരമായി പൂർത്തിയാക്കിയത്.
ദൗത്യത്തിന്റെ ഭാഗമായ രണ്ട് പേരും ലൂസിഡ് ഡ്രീമിംഗിൽ വിദഗ്ധരാണ്. ഉറങ്ങുമ്പോൾ കാണുന്ന സ്വപ്നത്തിൽ പൂർണ ബോധവാന്മാരായ രണ്ട് പേരെയാണ് പരീക്ഷണത്തിന് ഉപയോഗിച്ചത്. ഉറക്കത്തിന്റെ REM സ്റ്റേജിലാണ് (Rapid Eye Movement) ലൂസിഡ് ഡ്രീമിംഗ് സംഭവിക്കുക. തലച്ചോറ് ഏറ്റവും സജീവമായിരിക്കുന്ന ഘട്ടമാണിത്. ഈയൊരു ഘട്ടത്തിൽ കാണുന്ന സ്വപ്നങ്ങൾ തെളിച്ചമുള്ളതും വ്യക്തവുമായിരിക്കും.
പരീക്ഷണത്തിന് വിധേയരായവർ ഉറങ്ങാൻ ആരംഭിച്ചപ്പോൾ അവരുടെ മസ്തിഷ്ക തരംഗങ്ങളും പോളിസോമ്നോഗ്രാഫിക് ഡാറ്റയും പ്രത്യേക യന്ത്രം ഉപയോഗിച്ച് രേഖപ്പെടുത്തിയിരുന്നു. ആദ്യത്തെയാൾ ലൂസിഡ് ഡ്രീമിംഗിലേക്ക് കടന്നതോടെ അതിന്റെ തരംഗങ്ങൾ ലഭിച്ചു തുടങ്ങി. ഇതിൽ നിന്ന് റെമ്മ്യോ എന്ന പ്രത്യേകതരം ഭാഷയിലുള്ള ഒരു വാക്ക് ലഭിക്കുകയും ഈ പദം രണ്ടാമത്തെ വ്യക്തിക്ക് ഇയർബഡ്സിലൂടെ കേൾപ്പിക്കുകയും ചെയ്തു.
ആദ്യത്തെ വ്യക്തി ഷിലാക് ( ‘Zhilak’ ) എന്ന പദമാണ് സ്വപ്നത്തിനിടെ ആവർത്തിച്ച് ഉച്ചത്തിൽ പറഞ്ഞത്. അദ്ദേഹത്തിന്റെ ശബ്ദം സെൻസറുകൾ പിടിച്ചെടുത്ത് സെർവറിൽ ശേഖരിക്കുകയും ഈ സന്ദേശം രണ്ടാമത്തെ വ്യക്തിക്ക് കൈമാറുകയും ചെയ്തു.
ഉറങ്ങാൻ കിടന്ന് എട്ടാമത്തെ മിനിറ്റിലാണ് രണ്ടാമത്തെ വ്യക്തി ലൂസിഡ് ഡ്രീമിലേക്ക് പ്രവേശിച്ചത്. Zhilak എന്ന പദം ഈ വ്യക്തി കേൾക്കുകയും കേട്ടുവെന്ന് സ്ഥിരീകരിക്കാൻ അത് ഉച്ചത്തിൽ വിളിച്ചുപറയുകയും ചെയ്തു. ഇരുവരും ഉറങ്ങി എഴുന്നേറ്റപ്പോൾ കേട്ടവാക്ക് സ്വബോധത്തിൽ വെളിപ്പെടുത്തുകയും പരീക്ഷണം വിജയകരമായി പൂർത്തിയാക്കിയതായി പ്രഖ്യാപിക്കുകയായിരുന്നു.
ഉറക്കത്തിലായിരുന്ന രണ്ട് പേർ പരസ്പരം ആശയവിനിമയം നടത്തിയെന്നത് കേവലമൊരു നാഴികക്കല്ല് മാത്രമല്ല, ബോധമനസും ഉപബോധമനസും തമ്മിലുള്ള വിടവ് നികത്താൻ മനുഷ്യന് സാധിച്ചുവെന്ന ചരിത്രനേട്ടമാണ് ഗവേഷകർ കൈവരിച്ചത്.
ഇന്നലെവരെ സയൻസ് ഫിക്ഷൻ ചിത്രങ്ങളിൽ മാത്രമാണ് സ്വപ്നങ്ങളിലൂടെയുള്ള ആശയവിനിമയം സാധ്യമായിരുന്നത്. എന്നാൽ നാളെ അത് സ്വാഭാവികമായ കാര്യമായി മാറുമെന്ന് സ്ഥിരീകരിക്കപ്പെട്ടതായി REMspace സിഇഒയും സ്ഥാപകനുമായ മൈക്കൽ റഡുഗ പ്രതികരിച്ചു.
