മലയാളികളുടെ അഭിമാനമാണ് പാമ്പുപിടുത്തക്കാരനായ വാവ സുരേഷ്. ഉരഗങ്ങളെ ചെറുപ്പം മുതൽ കൈകാര്യം ചെയ്ത് പോന്ന വാവാ സുരേഷ് 50,000 ത്തിലധികം പാമ്പുകളെ പിടിച്ചിട്ടുണ്ട്. ഇതിൽ വളരെ അപൂർവമായ ചില പാമ്പുകളും ഉൾപ്പെടുന്നു. ഇപ്പോഴിതാ, അത്തരത്തിൽ ഒരു അപൂർവ്വ മൂർഖനെ പിടികൂടിയ സന്തോഷത്തിലാണ് വാവാ സുരേഷ്. സാധാരണയായി മൂർഖൻ പാമ്പുകളുടെ പത്തിയിൽ കണ്ടുവരുന്ന അടയാളമായിരുന്നില്ല അടുത്തിടെ വാവ സുരേഷ് പിടിച്ച മൂർഖന് ഉണ്ടായിരുന്നത്. സ്നേക്ക് മാസ്റ്റർ എന്ന പ്രോഗ്രാമിലൂടെയാണ് ഈ അപൂർവ മൂർഖനെ വാവ സുരേഷ് പരിചയപ്പെടുത്തിയത്.
“എന്റെ ജീവിതത്തിൽ, 35 വർഷത്തെ അനുഭവത്തിൽ ഇങ്ങനെ ഒരു പാമ്പിനെ കണ്ടുകിട്ടിയിട്ടില്ല. പത്തിയിൽ ലൗവിന്റെ ചിഹ്നം. ഈ ചിഹ്നമുള്ള ശലഭത്തെ നമുക്ക് കിട്ടിയിട്ടുണ്ട്. ഇങ്ങനെയുള്ള ഭാഗ്യങ്ങൾ എനിക്ക് ഉണ്ടാകുന്നു എന്നതാണ് എന്റെ ഏറ്റവും വലിയ സന്തോഷം. വിശ്വാസി എന്നതിന്റെ പേരിൽ ഫോറസ്റ്റുകാരുടെ ഒരു ഗ്രൂപ്പിൽ എന്നെ കളിയാക്കി. അതെ ഞാൻ വിശ്വാസിയാണ്. എല്ലാ മതത്തിൽ പെട്ടവർക്കും അവരുടേതായ വിശ്വാസമുണ്ട്. അമ്പലങ്ങളിൽ പോകുമ്പോൾ നാഗങ്ങളെ പ്രാർത്ഥിക്കും. ഞാൻ വിശ്വാസിയാണ്, അപ്പോൾ ഞാൻ എന്റെ വിശ്വാസത്തെക്കുറിച്ച് പറയും. പറയാനുള്ള അവകാശം എനിക്കുണ്ട്”-വാവാ സുരേഷ് പറഞ്ഞു.
തിരുവനന്തപുരം മെഡിക്കൽ കോളേജിന്റെ സമീപത്തുള്ള പൂട്ടിയിട്ടിരുന്ന വീടിനുള്ളിൽ നിന്നാണ് മൂർഖൻ പാമ്പിനെ കണ്ടുകിട്ടിയത്. വാവ സുരേഷിന് കിട്ടിയത് മോണോക്ലെഡ് കോബ്ര എന്നറിയപ്പെടുന്ന മൂർഖൻ ആയിരിക്കാം. ഇതിന്റെ പത്തി വിടർത്തിയാൽ പിൻഭാഗത്ത് (O) ആകൃതിയിലോ അല്ലെങ്കിൽ കണ്ണാടി പോലേയോ ഉള്ള അടയാളം ആണ് ഉള്ളത്. ഇതിനെ കേരളത്തിൽ കണ്ടുകിട്ടാറില്ല. എന്തുതന്നെയായാലും വാവാ സുരേഷിന് ലഭിച്ച മുർഖൻ അപൂർവമാണെന്ന് പറയാതെ വയ്യ. പത്തിയിൽ ലവ് ആകൃതിയിലുള്ള മൂർഖൻ ഒരു അപൂർവ്വ കാഴ്ചയാണ്.
