മാലി: മാലദ്വീപിൽ യുപിഐ അവതരിപ്പിക്കാൻ തീരുമാനിച്ചതായി മാലദ്വീപ് പ്രസിഡന്റ് മുമഹമ്മദ് മുയിസു. മന്ത്രിസഭയുടെ ശുപാർശയെ തുടർന്ന് യുപിഐ മാലദ്വീപിൽ അവതരിപ്പിക്കാനും ആവശ്യമായ നടപടികൾ സ്വീകരിക്കാനും തീരുമാനിച്ചതായി അദ്ദേഹം പറഞ്ഞു. ഡിജിറ്റൽ, സാമ്പത്തിക മേഖല മെച്ചപ്പെടുത്തുന്നതിനും ഡിജിറ്റൽ പബ്ലിക് ഇൻഫ്രാസ്ട്രക്ച്ചറിന്റെ വികസനത്തിൽ പങ്കുചേരുന്നതിനും ഇന്ത്യ സമ്മതിച്ചതിനെ തുടർന്നാണ് മുഹമ്മദ് മുയിസുവിന്റെ പുതിയ നീക്കം.
മന്ത്രിസഭാ യോഗത്തിൽ സാമ്പത്തിക വികസന വാണിജ്യ മന്ത്രി സമർപ്പിച്ച റിപ്പോർട്ട് മന്ത്രിസഭ വിശദമായി ചർച്ച ചെയ്ത ശേഷമാണ് യുപിഐ അവതരിപ്പിക്കാനുള്ള നീക്കത്തിന് തീരുമാനമായത്. യുപിഐ ഇടപാടുകൾ മാലദ്വീപ് സമ്പദ്വ്യവസ്ഥയ്ക്ക് കാര്യമായ നേട്ടങ്ങളും മറ്റങ്ങളും കൊണ്ടുവരുമെന്ന് പ്രതീക്ഷിക്കുന്നുവെന്ന് മുയിസുവിന്റെ ഓഫീസ് പുറത്തിറക്കിയ പ്രസ്താവനയിൽ പറയുന്നു.
മാലദ്വീപിൽ യുപിഐ അവതരിപ്പിക്കുന്നതിനായി ഒരു കൺസോർഷ്യം രൂപീകരിക്കാനും പ്രസിഡന്റ് മുയിസു തീരുമാനിച്ചു. ഇതിനുപുറമെ രാജ്യത്ത് പ്രവർത്തിക്കുന്ന ബാങ്കുകൾ, ടെലികോം കമ്പനികൾ, സർക്കാർ ഉടമസ്ഥതയിലുള്ള കമ്പനികൾ, ഫിൻടെക് കമ്പനികൾ എന്നിവ കൺസോർഷ്യത്തിൽ ഉൾപ്പെടുത്തണമെന്നും നിർദ്ദേശിച്ചു.
യുപിഐ സ്ഥാപിക്കുന്നതിന് മേൽനോട്ടം വഹിക്കുന്നതിനായി ധനമന്ത്രാലയം, ആഭ്യന്തര സുരക്ഷാ സാങ്കേതിക മന്ത്രാലയം, മാലദ്വീപ് മോണിറ്ററി അതോറിറ്റി എന്നിവ ഉൾപ്പെടുന്ന ഒരു ടീമിനെ രൂപീകരിക്കാനും മൊയ്സു തീരുമാനിച്ചിട്ടുണ്ട്. ഈ മാസം ആദ്യ വാരത്തോടെ ഇന്ത്യയിലെത്തിയ മുയിസു പ്രധാനമന്ത്രി നരേന്ദ്രമോദിയുമായി നടത്തിയ കൂടിക്കാഴ്ചയിൽ നയതന്ത്രബന്ധം ശക്തിപ്പെടുത്താനുള്ള ശ്രമങ്ങൾ മാലദ്വീപിന്റെ ഭാഗത്ത് നിന്ന് ഉണ്ടാകുമെന്ന് വ്യക്തമാക്കിയിരുന്നു.
