ന്യൂഡൽഹി: മനുഷ്യനെ ബഹിരാകാശത്ത് എത്തിച്ച് തിരിച്ചുകൊണ്ടുവരുന്ന ഇന്ത്യയുടെ അഭിമാന ദൗത്യമായ ഗഗൻയാൻ പദ്ധതി 2025ൽ നടക്കില്ലെന്ന് റിപ്പോർട്ട്. നേരത്തെ നിശ്ചയിച്ച തീയതിക്ക് മാറ്റം വരുത്തിയതായി ഐഎസ്ആർഒ ചെയർമാൻ എസ്. സോമനാഥ് അറിയിച്ചു. പുതിയ തീരുമാനപ്രകാരം 2026ലാകും ഗഗൻയാൻ ദൗത്യം നടക്കുകയെന്നും അദ്ദേഹം വ്യക്താക്കി.
ആകാശവാണിയിൽ സംഘടിപ്പിച്ച സർദാർ പട്ടേൽ സ്മാരക പ്രഭാഷണത്തിനിടെയായിരുന്നു ദൗത്യത്തിന്റെ പുതിയ ഷെഡ്യൂളിനെക്കുറിച്ച് ഇസ്രോ ചെയർമാൻ വെളിപ്പെടുത്തിയത്. മനുഷ്യനെ ബഹിരാകാശത്തേക്ക് എത്തിക്കുകയെന്ന നിർണായക ദൗത്യത്തെ ഇസ്രോ ജാഗ്രതയോടെ സമീപിക്കുന്നതിന്റെ ഭാഗമായാണ് നടപടി. ദൗത്യത്തിന്റെ സുരക്ഷയും വിജയവും ഉറപ്പാക്കുന്നതിനുള്ള ഇസ്രോയുടെ പ്രതിബദ്ധതയാണ് ഈ കാലതാമസം സൂചിപ്പിക്കുന്നത്. ഗഗൻയാൻ ദൗത്യത്തെക്കുറിച്ചുള്ള അപ്ഡേറ്റിനൊപ്പം ഇസ്രോ ചെയർമാൻ എസ്. സോമനാഥ് മറ്റ് ചില പ്രോജക്റ്റുകളുടെ സമയക്രമവും വിവരിച്ചു.
ഗഗൻയാൻ: 2026-ൽ
ചന്ദ്രയാൻ-4: സാമ്പിൾ റിട്ടേൺ മിഷൻ 2028-ൽ
നിസാർ: ഇന്ത്യ-യുഎസ് സംയുക്ത ദൗത്യം 2025-ൽ
ജപ്പാന്റെ ബഹിരാകാശ ഏജൻസിയായ ജാക്സയുമായി സഹകരിച്ച് ചന്ദ്രനിൽ ഇറങ്ങാനുള്ള ചന്ദ്രയാൻ-5 ന്റെ പദ്ധതികളെക്കുറിച്ചും ഇസ്രോ മേധാവി സൂചന നൽകി. ഇതിന്റെ വിക്ഷേപണ തീയതി തീരുമാനിച്ചിട്ടില്ലെങ്കിലും 2028ന് ശേഷം ചന്ദ്രയാൻ-5 ദൗത്യം പ്രതീക്ഷിക്കുന്നതായി ഇസ്രോ ചെയർമാൻ അറിയിച്ചു.
ആഗോള ബഹിരാകാശ സമ്പദ്‌വ്യവസ്ഥയിൽ ഇന്ത്യയുടെ സംഭാവന നിലവിൽ 2% മാത്രമാണ്. അടുത്ത ദശാബ്ദത്തിനുള്ളിൽ ഇത് രണ്ടിൽ നിന്ന് 10% ആയി ഉയർത്തുകയെന്നതാണ് ഇസ്രോയുടെ ലക്ഷ്യമെന്നും എസ്. സോമനാഥ് പറഞ്ഞു. അന്താരാഷ്‌ട്ര ബഹിരാകാശ രംഗത്ത് പ്രധാന പങ്കുവഹിക്കുന്ന രാജ്യമായി ഭാരതം മാറണമെന്നതാണ് ലക്ഷ്യമെന്നും അദ്ദേഹം കൂട്ടിച്ചേർത്തു.
