തിരുവനന്തപുരം: ഓഫീസ് സമയങ്ങളിൽ കൂട്ടായ്മകൾ വേണ്ടായെന്ന് സർക്കാർ ഉത്തരവ്. ഓഫീസ് സമയത്തുള്ള സാംസ്കാരിക പരിപാടികൾക്ക് ഉൾപ്പെടെ വിലക്ക് ഏർപ്പെടുത്തിയാണ് സർക്കാർ ഉത്തരവിറക്കിയത്. വകുപ്പ് അടിസ്ഥാനത്തിലുള്ള കൂട്ടായ്മകൾ ഒഴിവാക്കണമെന്നും സ്ഥാപന മേലധികാരികൾ പ്രത്യേകം ശ്രദ്ധിക്കണമെന്നും ഉത്തരവിൽ പറയുന്നു.
സർക്കാർ ഓഫീസുകളിൽ ജോലി സമയത്ത് വകുപ്പ് അടിസ്ഥാനത്തിലുള്ള കൂട്ടായ്മകൾ ഒഴിവാക്കണമെന്ന് ഉത്തരവിൽ പരാമർശിക്കുന്നുണ്ട്. സർക്കാർ ജീവനക്കാരുടെ പെരുമാറ്റച്ചട്ടങ്ങൾക്കും സർക്കാർ നിർദേശങ്ങൾക്കും അനുസൃതമല്ലാതെ ഓഫീസ് പ്രവർത്തനങ്ങൾക്ക് തടസമുണ്ടാക്കുന്ന രീതിയിൽ ഓഫീസുകളിൽ കൾച്ചറൽ ഫോറങ്ങൾ നടക്കുന്നത് സർക്കാരിന്റെ ശ്രദ്ധയിൽപ്പെട്ടിട്ടുണ്ടെന്ന് ഉത്തരവിൽ ചൂണ്ടിക്കാട്ടുന്നു.
അതേസമയം, ഇത്തരം നിയന്ത്രണങ്ങൾ ഉണ്ടായിരുന്നിട്ടും ജോലി സമയങ്ങളിൽ സിഐടിയു ഉൾപ്പടെ സമരപരിപാടികളിൽ പങ്കെടുക്കുന്നത് തുടരുകയാണ്. പഞ്ചിംഗ് ചെയ്ത ശേഷം സമരങ്ങളിലും പാർട്ടി പരിപാടികളിലും പങ്കെടുക്കുന്നതും പതിവാണ്. ഇതിന്റെ പശ്ചാത്തലത്തിലാണ് സർക്കാർ പുതിയ ഉത്തരവിറക്കിയിരിക്കുന്നത്.
