മുംബൈ: മുംബൈ മുലുന്ദിലെ മലയാളികൾക്ക് കലാസ്വാദനത്തിന്റെ പുതിയ അനുഭവമൊരുക്കാൻ ലെജന്റ്‌സ് ലൈവ്. മുലുന്ദ് കാളിദാസ് നാട്യ മന്ദിർ ഹാളിൽ ഇന്ന് (ശനിയാഴ്ച, നവംബർ 9) വൈകീട്ട് 7 മണിക്കാണ് പരിപാടി. ഗായകൻ സുരേഷ് വാഡ്ക്കറുടെ പാട്ടിനൊപ്പം പടയണി കോലങ്ങൾ ചുവടുവയ്‌ക്കുമ്പോൾ മലയാളികൾക്ക് അത് ഗൃഹാതുരത്വം നിറഞ്ഞ അപൂർവ്വ അനുഭവമായി മാറും.
അത്യാധുനിക സങ്കേതങ്ങളുടെ അകമ്പടിയോടെ അന്തരാഷ്‌ട്ര നിലവാരത്തിൽ ക്രമീകരിച്ച ശബ്ദ വെളിച്ച രൂപകല്പനയിലാവും ലെജന്റ്‌സ് ലൈവ് അരങ്ങേറുക. മുംബൈ മലയാളി നിഖിൽ നായർ സംവിധാനം ചെയ്യുന്ന ഈ സംഗീത നിശ തലമുറകളിലൂടെ ലക്ഷക്കണക്കിനാളുകളെ സ്വാധീനിച്ച സുരേഷ് വാഡ്കറുടെ ക്ലാസ്സിക് ഗാനങ്ങളുടെ നേർസാക്ഷ്യമാവും. ലെജന്റസ് ലൈവിന്റെ ആദ്യ പതിപ്പിൽ സുരേഷ് വാഡ്കർ പാടുമ്പോൾ മുംബൈയിൽ ഇതാദ്യമായി കേരളത്തിന്റെ കാർഷിക സംസ്‌കൃതിയും സംസ്‌കാരത്തിന്റെ തിരുശേഷിപ്പുകളുമായി ഇഴചേർന്ന പടയണി കോലങ്ങളും നിറയും.
ഹിന്ദി മറാഠി ഭക്തി ഗാനങ്ങളിലൂടെ ആസ്വാദകഹൃദയം കവർന്ന സുരേഷ് വാഡ്കർ പുതിയൊരു സംഗീത പരമ്പരയ്‌ക്ക് തുടക്കമിടുമ്പോൾ പടയണിയുടെ പശ്ചാത്തലം കൂടി കൂടിച്ചേരുന്നത് മഹാനഗരത്തിനും നവ്യാനുഭവമാവും. തെക്കൻ കേരളത്തിലെ ഏറ്റവും പ്രശസ്തമായ കടമ്മനിട്ട ഗോത്രകലാകളരിയിലെ കലാകാരന്മാരാണ് കോലങ്ങൾ അണിയിച്ചൊരുക്കുന്നത്. കെ.ആർ. രഞ്ജിത്ത് കടമ്മനിട്ടയുടെ നേതൃത്വത്തിലാണ് പാള കോലങ്ങളും കുരുത്തോല കൈവിരുതുകളും വേദിയിൽ ഒരുങ്ങുന്നത്. കമുകിന്റെ അലകിലും പച്ചയീർക്കിലിലും പാളകളിലുമായിട്ടാണ് കോലങ്ങൾ തയ്യാറാക്കുന്നത്.
2018 ലെ കേരള സംസ്ഥാന സർക്കാർ സാംസ്‌കാരിക വകുപ്പ് ഏർപ്പെടുത്തിയ വജ്ര ജൂബിലി ഫെലോഷിപ്പ് ജേതാവും 2019 ലെ കേരള നാടൻ കലാ അക്കാദമി യുവപ്രതിഭ പുരസ്‌കാര ജേതാവുമാണ് കെ. ആർ.രഞ്ജിത്ത് കടമ്മനിട്ട. അനീഷ് കടമ്മനിട്ട, സജിത്ത്, കൃഷ്ണകുമാർ, ഉമേഷ്, രണ്ടീപ് എന്നീ കലാകാരന്മാർ പങ്കെടുക്കും.
പുത്തൻ സാങ്കേതിക വിദ്യകളെ ഏറ്റവും മികച്ച രീതിയിൽ പരിചയപ്പെടുത്തുന്നതിൽ മികവ് തെളിയിച്ച നിഖിൽ ബിഗ് ബോസ് ഹിന്ദി, മറാത്തി മലയാളം സീനിയർ പ്രൊഡ്യൂസറും സ്റ്റുഡിയോ ഡയറക്ടറും IIFA അവാർഡ്സ്, സ്റ്റാർ പരിവാർ തുടങ്ങി നിരവധി മെഗാ ഷോകളുടെ ഇവൻറ് കോഓർഡിനേറ്ററും ആയിരുന്നു.
മുൻ ലോക കേരള സഭാംഗവും മലയാളം മിഷൻ അധ്യാപികയും കേരള കേന്ദ്രീയ സംഘടന കമ്മിറ്റി അംഗവുമായ രാജശ്രീ മോഹന്റെയും സി.കെ. മോഹൻ കുമാറിൻറേയും മകനാണ് നിഖിൽ. മുംബൈയുടെ സാംസ്‌കാരിക സാമൂഹിക മണ്ഡലങ്ങളിൽ സജീവ സാന്നിദ്ധ്യമായ നിഖിൽ ഇപ്പോൾ ആർട്ടിഫിഷ്യൽ ഇൻറലിജൻസിൽ MBA ചെയ്യുന്നു. കമ്പ്യൂട്ടർ എഞ്ചിനീയറും ഇവൻറ് മാനേജ്‌മെൻറിൽ മാസ്റ്റർ ഡിഗ്രിയും എടുത്തിട്ടുണ്ട് നിഖിൽ.
പാസുകൾക്കും കൂടുതൽ വിവരങ്ങൾക്കും ബന്ധപ്പെടുക
+91 9757 396 372
+91 8928 988 129
